Vawiin khan Chief Secretary Pu Van Hela Pachuau IAS kaihhruaina hnuaiah Ruihhlo khuahkhirh leh HIV/AIDS chungchangah Chief Secretary’s Conference Hall-ah meeting neih a ni a. Meeting hi United Nations Office on Drugs and Crime (UNODC) huaihawt niin DGP Mizoram; Home, Social Welfare leh Excise & Narcotics Department-a Secretary te; heng department leh Health &Family Welfare Department hotulu dangte; Mizoram Social Defence & Rehabilitation Board (MSD&RB) CEO leh a thawhpui te; Project Director MSACS; Commander HQ 23 Sector Assam Rifles leh BRTF aiawh te chu an tel a ni.

Chief Secretary Pu Van Hela Pachuau chuan ruihhlo leh AIDS/HIV te hian khawtlang nun nasa takin a nghawng a tiin hei hian hmasawnna a dal thu a sawi a. Hemi kawnga Sawrkar Department hrang hrang ten thawhhona tha an neih a pawimawh thu a sawi bawk a ni.

Meeting ah hian Excise & Narcotics Department in Mizoram-a NDPS Act an kenkawh dan chungchang ; MSD&RB in ruihhlo ngaite enkawlna an kalpui dan leh an hnathawh dan chungchang leh MSACS in ruihhlo a inchiu thinte a hranpa a Targetted Intervention an kalpui dan chungchang ah te presentation an nei theuhva. UNODC Regional Office for South Asia aiawh Pu Kunal Kishore chuan ‘Mizoram legal & Policy Framework on Drugs – A Review of Challenges and Opportunities’ tih thupui hmangin presentation a nei bawk a. Hemi hnu hian ruihhlo leh HIV/AIDS chungchangah zau takin sawiho hun hman a ni a.

Meeting chuan ruihhlo leh a kaihhnawih hi Department pathum enkawl a nih vangin a National Narcotics Policy 2012 zulzuia a hranpa a Mizoram tan Narcotics Policy duan chu tha tiin hemi chungchanga hmalak nise tih an rel a. Ruihhlo hrang hrang hmang thinte huam zau taka Survey nei nise tih pawh an rel bawk a ni.