Chief Minister Pu Lal Thanhawla’n ‘Zitirtute file khawih hi mihring an ni a, an pawimawhna hi a thuk bik em em a ni’ a ti. He thu hi vawiina Mizoram Middle School Teachers Association in General Conference vawi 8-na Synod Conference Center-a a hmanpuina a a sawi a ni.

Chief Minister chuan ‘Zitirtute file khawih hi mihring an ni a, an pawimawhna hi a thuk bik em em a ni’ a ti a. Chuvangin zitirtute chu neitu rilru pu a, intuaithar reng turin a chah a. Kan hnathawhna hmun apiang hi Pathianin a rawngbawl tura min dahna a ni tih hria a, tui taka thawh hi kan tih tur a ni a ti a. Mahni hna a tuilo, tlemte thawha tam tak lakluh tum thahnem tak kan awm hi a pawi hle a ni. Thawk tha peih lova aikal lak te hi dan bawhchhiatna a ni a, chuvangin a chhelai siamtha tu nih tuma, theihtawp chhuah reng turin zirtirtute chu a ngen a ni.

Zirtirtu kalkhawmte chu an hnathawh a phuisui theih nan pre-service leh in-service ngaihpawimawh a tul thu Chief Minister chuan sawiin, promotion chungchangahte pawh seniority ringawtah innghat lovin, an thiamna(efficiency) ah nen innghat kawp se a ti a. An nitin hnathawhah naupangte la mamawh tur thlir tel chunga, competitive spirit an neih theihna tur lam hawia kalpui thin turin a chah a.Lehkha zir sang hmantlak siloh chherchhuah hi khawtlang tana hnawksak anih theih avangin, chhawrtlak ngei an chherchhuah theihna turin mahni theuh intuaithar reng turin a fuih a ni.

Chief Minister chuan hnam changkang tehna ber chu education leh hriselna hi a ni a ti a. Zirna tha leh hriselna tha nei thei tura a hmanraw pawimawh ber pakhat chu zirtirtute hi in ni a ti a.Literacy a san hi educationah kan sang tihna a nilo a ti a. Hei hi sorkar pawhin hriain zirna tha zawk kan neih theihna turin Education Reforms Commission, India a a pahnihna pawh sorkarin a din tawh thu sawiin; hman anih theihna tura sum mamawh, Rs 700 Crore pawh Planning Commission leh DoNER Ministry in intumsem tura ngaihtuahna siam mek a ni a ti. Hriselna tha kan neih theihna turin nasa taka tan lak reng anih thu a sawi bawk a. Chief Minister chuan sorkar flagship programme NLUP a hlawhtlin ngei theihna turin, a dawngtute kaihruai turin zirtirtute chu an awmna theuhah, kawng dik kawhhmuhtu ni theuh turin a chah bawk a. Ram leilung fa vek kan ni a, kan dikna leh chanvo a inang vek a, a chhelai siam thatu nih vek i tum ang u tiin, kalkhawmte chu a chah a ni.

MSTA General Hqrs hnuaiah hian Joint Hqrs 2 leh Sub Hqrs 12 an awm a, an vaiin member 3305 an awm mek a ni.

Inkhawm hi Pu C. Thantluanga, Sr Vice President, MSTA in a kaihruai a. An rorelna ah agenda 7 an sawiho bawk a ni.