Vawiin nileng khan Serchhip DC Conference Hall-ah DFDO, Serchhip buatsaihin “Fish Farmers’ Training on Technology of Fish Culture” neih a ni a, District Bawrhsap Pu P.Lalchhuanga khuallian niin Serchhip District chhunga khaw hrang hrang atangin Sangha khawi lama tui mi thahnem tak an tel a, Sangha Dil siamte tanpuina pawh sem nghal a ni bawk.

Training hawnna inkhawma thusawitu District Bawrhsap chuan sangha khawi chu thil awlsam te ang a lang, mahse uluk leh fimkhur ngai tak anih avangin uluk taka rilru leh ngaihtuahna seng chunga training la turin kalkhawm te chu a fuih a, Sawrkarin eng anga nasa a hma la in tanpuina pe tam mahse a dawngtu ten thahnemngaihna leh rinawmna nen a hma an lak chhunzawm loh chuan awm zia a awm dawn chuanglo a ni tiin Sangha dil siam leh khawi chungchangah pawh mahni ngaihdan ringawt a kal lova, mithiam zawk sawrkarin a rawihte thu awih turin a sangha khawitute chu a chah nghal bawk a ni.

Pu S.P.Singh, DFDO pawhin tanpuina sum pek chhuah chung changah Sawrkarin sum awmdan atanga tanpuina pek theih zat a bithliah thin avangin vawi leh khatah mi zawng zawng pek sen ani lo tih sawiin, a dawngtu thlan chungchangah an fimkhur thu a sawi a, amaherawhchu thawktu lam indaih lohna a nasat em avanga duh anga hna an thawk chak theilo chu pawi a tih thu a sawi bawk.

Vawiin Training hi topic ah then niin, Sangha dil siam dan leh enkawl chhunzawm dan te, Common Carp khawi dan te, Sangha tui lak dan leh him dama khawi theih tura enkawl dan te zir a ni a, Sangha Dil neitute bakah sangha khawi lama tui mi engemawzatin he training hi an chhim a ni.