2258/2024-2025

Aizawl, September ni 27, 2024: Vawiin khan Aizawl DC Conference Hall- ah Nasha Mukt Bharat Abhiyaan, Aizawl District hnuaia Master Trainers Training on 'Drug Abuse Prevention among women' chu neih a ni a. He hun hi Aizawl DC Er. Lalhriatpuia chuan khuallian niin a hawng. 

Nasha Mukt Bharat Abhiyaan (Drug Free India Campaign) hi central sawrkar hmalakna niin ruihhlo ti mek ten damna kawng an zawh theihna tura puih leh a la ti ve lote venhim hi a tum ber a ni a. Vawiin hian master Trainer mi 17 thlanchhuah te hnenah training hi pek a ni. 

DC chuan hna training nei tura kalkhawmte chu lawmna thu sawiin, Master trainers te chu ram leh khawtlang siamthatna kawnga hna pawimawh tak thawk tur an nih thu a sawi a. DC chuan ruihtheihthil do kawngah demand reduction – ruihtheihthil duhna leh mamawhna lama awmza nei a thawk tur chuan rilru puthmang leh nunphung thlak a pawimawh thu a sawi a. Ministry of Social Justice & Empowerment, Govt. of India leh AIIMS, New Delhi tangkawp in kum 2019 khan India ram puma ruihhlo hmansual dan zirchianna 'Magnitude of substance use in India 2019' chungchang sawiin, chuta a landan chuan Mizoram chu India ram pumah opiods kaihhnawih (heroin etc.) hmansual ah a san ber thu a sawi a. A lungchhiat thlakin  inenlet a hun tawh takzet thu a DC Er. Lalhriatpuia chuan a sawi a. Mizoram chu ruihtheihthil tawlhrukna kawnga kan awm avangin kan vanduai a ni, a ti a. Heng zawng zawng hi ngawrh lehzual zawka ruihhlo kan do a, ruihhlo avanga harsatna tawkte kan puih kawnga tan min lak tirtu ni se tiin training hlawkthlak tak an neih a duhsak thu a hlan. 

Aizawl District Nasha Mukt Bharat Abhiyaan chuan Hmeichhe zinga ruihhlo leh a kaihhnawih chungchang zirtirna uar taka kalpui tha a tih avangin hemi kawnga hma lo la turin sub-committee on 'Drug Abuse Prevention among Women' chu a din a. MHIP General Headquarters te nena tangkovin hma an la mek a ni. Phase I ah khan Mizoram ah pawh district pathum thlan niin Aizawl, Champhai leh Kolasib ah te hma lak a ni. Tin, Phase II ah hian district 100 tihbelh lehin tunah hian Nasha Mukt Bharat Abhiyaan hi District 372 ah kalpui mek a ni a, Mizoramah pawh district zawng zawng (11) a rawn huam ta a ni. District tinah hian Deputy Commissioner te hi he campaign ah hian Chairman an ni bawk. 

Vawiin programme hi Pi Ngurmawii Sailo, President, MHIP General Headquarters chuan a kaihruai a, Master Trainers tur hian mi 17 thlanchhuah te hian an hmeichhiatpuite hnenah ruihhlo leh a kaihhnawih chungchanga zirtirna chu an kalpui dawn a ni. Master Trainers te hi Mizoram Social Defence & Rehabilitation Board (MSD&RB), Social Welfare & Tribal Affairs atangin zirtirna hi pek a ni.