Home Minister Pu R. Lalzirliana hovin vawiin chawhma dar 11 khan Aizawl Vanapa Hall ah Social Welfare Department buatsaihin International Day Against Drug Abuse & Illicit Trafficing hman a ni.
Khuallian Pu R. Lalzirliana chuan Khawvel pum huap Ruihhlo Hmansual leh Dan lova Sumdawnna Dona Ni atan United Nations General Assembly chuan kum 1987 khan kum tin June ni 26 hi an lo ruat tawh chu Mizoram ah pawh vawi 14 kan hman na tur a nih thu sawiin, UNODC ( United Nations Office on Drugs and Crime ) chuan he ni puala thupui a siam chu “Ruihlo tel lova hmasawnna- Kan nun, kan khawtlang,kan nihna ah” tih a ni ang in ruihhlo hmansual laka inven hi a pawimawh tak zeta, chutiang bawk in ruihhlo vanga harsatna tawk mekte chu mumal tak leh kawng hmang nei taka enkawl zui pawh a tul a, hetah hian sawrkar, kohhran, YMA leh tlawmngai pawl hrang hrang pawh in nasa takin hma an la mek zel a, tan ho a tul tak meuh a ni a ti a . Hriat theih chinah Mizoram-ah kum 1984 khan Heroin OD vanga thi an awm tan a, 1989 atangin spasmo-proxyvon vanga thi an awm tan bawk a. Kum 2015 alo her chhuah meuh chuan ruihlo hrang hrang hmansual avangin mi 1300 chuang daih mai an thi tawh a ni tiin ruihhlo laka invenna leh ruihhlo ngai te enkawlna lama hmala turin Mizoram sawrkar pawhin Social Welfare Department hnuaiah Mizoram Social Defence and Rehabilitation Board( MSD&RB) a din ta hial a ni. Hetiang lama harsatna tawk emaw, ruihhlo chungchanga zirtirna pek mamawh emaw te chuan inthlahrung hauh lovin he MSD&RB hi chhawr tangkai tura sawrkar din a ni tih hriat a tul thu a sawi a ni.
Khualzahawm Pu P.C. Lalthanliana, Minister, Social Welfare Department pawhin thu sawiin, ruihhlo hman sual leh mihring in rukbo chungchang kan zirna ah hian tunlai zirlai leh thangthar ho te hi, a do tu pawl kan nih tih inhria in sawkar, pawl, kohhran leh vantlanga do mai a tawk lova, mimal in kan do theuh a pawimawh a ni a ti a, heng sualte hi kan kawngka bulah bawk reng in zuan luh an tum reng in a lo do tur hian ram pum ah ke pen tur leh harh thar tur in a ngen nghal .
Pu K Lalrinthanga, Parliamentary Secretary, SWD kaihhruai vawiin programme ah hian Power Point Presentation hmangin Pu Lallianmawia, SP (Crime ) in “Prevention of Drugs Trafficking in Mizoram“ sawiin Mizorama ruihhlo lo luh dan leh a ven dantur a sawi a. Ruihhlo bawih atanga tal chhuak te thusawi leh Sikul naupangte lemchan entir a ni.
