279/2022-2023
Aizawl, the 26th April 2022 : Rural Development changtu Minister Pu Lalruatkima chuan vawiin khan Mizoram State Rural Livelihoods Mission (MzSRLM) Annual Action Plan 2022-23 Roll Out Workshop hawnna chu Chanmari YMA Hall ah a hmanpui.

Hun hmanpuitu RD Minister Pu Lalruatkima chuan Covid-19 pandemic avanga kum hnih chhung AAP Rollout workshop neih theih anih loh hnuah tun kumah hun remchang a rawn in herchhuak leh chu lawmawm a tih thu a sawi a. MzSRLM hmalakna hnuaia thingtlanga mi harsa zawkten SHG kaltlanga hmasawnna hrang hrang an neih te lawmawm a tih thu a sawi a. MzSRLM staff te thahnem ngaihna leh inpekna chu lawmawm a tiin tun aia tha a thawk zel tur leh thawhhona thatak nei zel turin a fuih a ni.

Mizoram a Covid-19 dona kawnga SHG member te inpekna leh hnathawhna ropui a tih zia tarlangin Minister chuan Sorkar in theihtawpin MzSRLM leh a SHG te hmalakna a tawiawm zel tur thu a sawi bawk. MzSRLM scheme bakah Rural Development Scheme hrang hrang MGNREGS, PMAY leh SPMRM te kaltlanga Mizoram thingtlang mite tan hmasawnna hrang hrang kalpui mek anih thu sawiin PMKSY Version-2 hnuai ah Block 26 a Cluster 12 tuam tura ruahmanna kalpui mek anih thu a sawi bawk.

Workshop hawnna hi Pi H. Lalchhandami, CEO, MzSRLM chuan kaihruaiin he mission hnuaia hmalakna hrang hrangte sawiin Self Help Group te chu thingtlang mipuiten an tangkaipui dante a sawi a. Financial Year 2022-23 chhunga MzSRLM hmalakna tur hrang hrangte powerpoint presentation kaltlangin a sawifiah bawk. MzSRLM hmalakna hnuaia Self Help Group hlawhtlingte hmalak dan success stories video enhona hun hman a ni bawk.

He AAP Rollout Workshop neihnaah hian Mizoram chhung hmun hrang hrang atangin MzSRLM staff te an kalkhawm a. He workshop hi 2nd May, 2022 thlenga neih tur a ni. A hawnna programme hi Dr Zomuankima, State Mission Manager (Farm Livelihoods), MzSRLM chuan lawmthu sawiin hun a khar a ni.

Tun dinhmun ah MzSRLM hian Mizoram chhunga District 11 leh RD Block 26 ah hmalakna a kalpui mek a, tun dinhmunah thingtlang khua 684 luh tawh niin Self Help Group 8249 din a ni tawh in SHG member 72025 an nei a ni.