Rural Development Department chuan Shyama Prasad Mukherjee Rurban Mission in kum 4 a tlin lawm nan leh he Mission thil tum te mipui in an hriatzau zawk nan programme hrang hrang te duangin nimin atang khan heng programme te hi an hmang tan a. Nimin khan Rurban Cluster chungchang chu PIB, AIR leh DDK te nen MINECO ah an sawiho a. Vawiin khan Rurban Mission in nitin khawsak inrelbawlna a nghawng tha a nei dan te BDO Conference Room Aibawk ah a khaw mipuite nen sawiho niin awareness programme neih a ni a. February ni 24 ah pawh hetiang programme hi Thingsulthliah RD Block ah neih tum a ni.

Sawrkar laipui chuan kum 2016 khan Ministry of Rural Development hnuaiah SPMRM (RURBAN) Scheme thar a duang a. He scheme hian khawpui hnaiha thingtlang khuate kawng hrang hranga an hmasawnna theihna tur kawng a dap sak thin a ni. Prime Minister Pu Narendra Modi chuan ni 21 February, 2016 khan Kurubhata, Murmunda Rurban Cluster, Rajnangaon, Chattisgarh khan a he Mission hawnna a nei ani.

Cluster(RD Block) te hi Ministry atanga Framework/Guidelines zul zuia thlan a ni a, tlangdung khata mipui cheng 5000 – 15000 inkar te huam in, heng khaw thlanah hian hmalakna a kalpui a. Heng Khaw hlawm Cluster-te hi ruahmanna felfai tak siamsakin, khua tih hmasawn leh tihchangtlun a tum a. SPMRM-ah hian Cluster 300 chuang India hmun hrang hrangah kum 3 chhungin kalpui tum a ni a. Mizoram-ah SPMRM hi Rural Development Department hnuaiah heng RD Block pali-ah te hian kum 2016 atang khan kalpui tan a ni – Aibawk(2016), Thingsulthliah (2017), East Lungdar(2017) leh Khawzawl(2017) RD Block te.

SPMRM (RurBan)Scheme-in a tum ber chu India rama States leh UT khawpui hnaiha awm thingtlang khua, khawpuia hmasawnna leh changkanna awm anga dawm kang thei tura ngaih khuate thlan chhuah a, tihchangtlun lehzual ani a. Hetiang khua thlan chhuah hlawm(Clusters/RD Block) te tichangtlung tur hian hma chi hrang hrang a la a. A langsar zual te chu - Khuaa mi cheng te tui thianghlim in tur hniang hnar taka pek te, mipuite ziak leh chhiar thiam tir mai bakah tunlai thiamna Information Technology hman tangkai thiam (Digital literacy) tura zirtir te, ran enkawl dan tha, kan thil tharchhuah dah thatna (cold storage) lama hmalak te, inkalpawhna kawng tha zawk siam te, Bawlhhlawh paih leh sawngbawlna felfai zawk siam te, tourism, thalai thiamna (skill) tihpun leh zirtir te, renewable energy, hriselna lama awareness pek te, a thlawna inentirna (free clinic) buatsaih leh sub-centre a damdawi leh hmanrua pek te, Zirna In (school) tihchangtlun leh a dang te a huam a ni.

Rurban Cluster-a hmalakna tur atan project fund kalphung hi- 70% hi Convergence hmanga sawrkar Scheme hrang hrang dang atanga sum huikhawm leh a bak 30% chu Sawrkar laipui atanga lokal,Critical Gap Funding (CGF) hmangin hmalak a ni.

SPMRM hnuaia hnathawh dan tur ruahman lawk atanga hnathawh tawh dan tlangpui chu hetiang hi a ni: Aibawk RD Block(Phase-I) hnuaiah 70% chu hnathawh zawh tawh a ni a. Thingsulthliah RD Block(Phase-II) hnuaiah 40% hnathawh zawh tawh a ni bawk a. East Lungdar RD Block(Phase-III) hnuaiah 20% hnathawh zawh tawh niin, Khawlzawl RD Block (Phase-III)ah 20% thawh zawh tawh a ni bawk.

SPMRM hnuaia India rampuma hnathawk tha thlan zingah Mizoram chuan kum 2016-17 khan “Best Performing States at National Level” ah Lawmman Pahnihna(2nd Prize Award) a la a. Hemi bakah hian Mizoram chuan kum 2018-19 leh kum 2019-20 khan “Best Performing States at National Level” Lawmman Pahnihna tho a la ve ve bawk a ni.

He Scheme-in a huam khuate hmasawnna tur hian hmachhawp/ruahmanna hrang hrang te a awm mek a. Chungte tihlawhtling tur chuan Rural Development Department, Mizoram Sawrkar chuan chak takin hma a la mek a ni.