3887/2022-2023
Aibawk, 17th March, 2023 : Rural Development Minister Pu Lalruatkima chuan vawiin chawhnu khan cheng nuai 400 senga sak Aibawk Mini-Sports Complex a hawng a, bialtu MLA, Dr F. Lalnunmawia, Vice Chairman Horticulture Development Board chuan khual zahawm niin he hun hi a hmanpui a, he hunah hian Rural Development Department in Mini-Sports Complex hi a enkawl tura ruat Management Committee hnenah a hlan nghal a ni.

Mini-Sports Complex hawnna inkhawm buatsaihah khuallian Pu Lalruatkima chuan Aibawk leh a chhehvel khua ten khelmual tha leh infiamna hmun tha tak an nei ta chu a lawmpui thu a sawi a. Aibawk leh a chhehvel khua te tih hmasawnna tura Rural Development in tan a lak nasat zia sawiin an hmalakna ten rah tha a chhuah zel thin chu lawmawm a tih thu a sawi bawk. Infiammiten tangkai taka an hman a hlawhtlinna ropui tak tak an neih theihna atana rahka pawimawh tak nise a duh thu sawiin, nu leh pate pawh an fate zingah infiamna lama tui an awm chuan phurpui thin turin a chah bawk a ni. Infiamna hi insawizawina tha tak a nih bakah thian siamna atan pawh a pawimawh em em a, mimal bakah khawtlang a tilungrualin a tihmasawn thin a, uar deuh deuh a pawimawh a ni a ti bawk.

Aibawk RD block chu India ram pumpuia RURBAN cluster zingah RURBAN project zo fel hmasa ber leh thawk tha ber a ni tih sawiin, Pu Ruatkima chuan project hnuaia item chi hrang hrang 48 a hun taka zawhfel a ni hian hmasawnna pawh nasa takin a thlen a, sawrkar laipui atanga endiktu rawn kalte pawhin lawmawm an ti a, Ministry of Rural Development pawhin a fak a, hetiang dinhmun an thlen theihna chu khawtlang mipuite inlungrualna leh thawhhona that bakah sawrkar an thawhpui thiam vang a ni tih sawiin entawntlak an nih thu a sawi bawk a ni.

Khual zahawm, bialtu MLA ni bawk Dr F. Lalnunmawia chuan Aibawk Mini-Sports Complex sak mek chu khawtlang mipui ten an nghahhlelh em em mai a nih thu sawiin, a hlawhtlinna hmuh a ni ta leh hawn a ni ta chu lawmawm a tih thu a sawi a, Rural Development Department kaltlanga a bial chhunga hnathawh tawh leh kal lai mek chi hrang hrangte avangin hmasawnna nasa tak an hmuh thu sawiin khawtual mite vakah infiammi ten tangkai taka hmang tura duhsakna hlanin dimdawi leh duat taka enkawl a tul thu a sawi bakah Mini-Sports Complex tihchangtlun zelna turin theihtawp chhuah a tum thu a sawi a ni. Mini-Sports Complex a hlawhtlin theihna tura tha thawhtute zawng zawng chungah lawmthu a sawi bawk a ni.

Aibawk Mini-Sports Complex hi DoNER Ministry hnuaia NLCPR kaltlanga khelmual project 4 zinga 1 niin, he project atana a tira sum ruahman cheng nuai 413 ah nuai 13 chu DoNER ministry in lo cut in May ni 5, 2017 khan cheng nuai 400 sanction a ni.

Mini-Sports Complex sakna tur tender hi October ni 26, 2017 ah tih chhuah niin, February ni 5, 2018 ah NECS hnenah hna pek a ni a. He hna hi work order pek atanga kum 2 chhunga sak zawh tur a nih laiin COVID-19 hripui leng vangin hun tiam chhunga zawh theih a ni lova, vawi 3 lai hun pawhsei sawrkarah dil a nih hnuin March ni 31, 2022 ah a hna lian (main component) zawh fel anga ngaih a ni a. A tihchangtlunna tur atan contractor hian hna a thawh chhunzawm zel tho a ni.

Project tan tirhah hian a hmunhma neih sa in standard size a phak loh em avangin PWD leh School Education Department ten an ram an pek belh a, naupang tlak dalna (fencing) thui tak DPR ah hian telh niin, DPR a tel lo thil chi hrang hrang ball tlak dalna, fencing, approach stone masonry step, side drain etc. siam belh a ni bawk.

Mini-Sports Complex ah hian Contact Sports Centre lian tha tak sak a nih bakah Aibawk Playground awm sa chu standard size tlinga laih zau a ni a, gallery leh pavillion tha tak sak a ni bawk a ni.

Aibawk Rural Mini-Sports Complex hawnna inkhawm hi Pu R. Lalthazuala, Director, RD Department in a kaihruai a, Pu A. Chhalai, EE, RD Department in technical report a pe a, Aibawk VCP Pu Rosiama'n lawmthu sawiin a khar a ni.