Novel Coronavirus chungchangah thuthang, belhchian dawllo leng vak a tam a, mipuite chi-ai lovin sorkar thuchhuakte ngaih ven a, fimkhur turin Information & Public Relation Minister Pu Lalruatkima chuan a chah. He thu hi tukina Khamrang khaw chawm tur Solar Plant hawnna hun tawi neihah a sawi a. He natna hrik leng mek chungchangah mipuiten thuchiang an hriat a tul a, hriattur pawimawh sawrkarin a chhuahte ngaihven thin turin a chah a ni.

Rural Development changtu Minister Pu Lalruatkima chuan ram leilung thing leh mau tichhe lo zawnga hmasawnna kalpui a tul tawh takzet tih sawiin Khamrang khawtlang hruaitute thahnemngaihna avanga eng chhit tur hnianghnar zawk an nei thei chu lawmawm a ti a. RD hmalakna hnuaia Ni 100 inhlawhna kalpui mekah tun ah hian sawrkar laipuiin cheng vaibelchhe 30 an rawn sanction leh tawh bakah cheng vaibelchhe 40 pawh pek leh thuai an beisei tih Minister chuan a sawi a. Nikhata an hlawh thin cheng 211 pawh minimum wages mila kalpui turin ngen mek a ni a, thla thar lamah chuan tihhlawhtlin theih an beisei, a ti. PMAY Gramin mi harsa zawkte insak tanpuina tur pawh sorkar laipui atangin engemawzat an dawng leh dawn tih Minister hian a sawi bawk.

Tukina Khamrang khaw tana Solar Plant hawn tak hi "MIMIR Project" hnuaia inelna siam atanga Khamrang VC ten lawmman pakhatna an dawn hmanga cheng nuai 100 senga siam a ni a. Chhungkaw 212 ten LED Bulb 2 theuh an chhi thei dawn a. A siam hna hi Agni Power & Electronics ten thawkin, wiring leh fitting hi Khelte Enterprise ten an thawk a ni. Tukina Solar Plant hawnna hun hi Khamrang Silver Jubilee nena hmang kawp tur ruahmanna awm hmasa chu Minister ngenna leh sawrkar thuchhuak bawhzuina ni pah fawmin vantlang inkhawm chu thulh a ni a. Khamrangin Jubilee ruai atana ei leh in an buatsaih chu TNT hnenah hlan a ni bawk.