Ramri hrula khuate tihchangkanna tur ngaihtuahin vawiin khan State Level Screening Committee(SLSC) on Border Area Development Programme (BADP) chu Pu Vanhela Pachuau, Chief Secretary leh Chairman SLSC on BADP ni bawk hovin sawrkar mipawimawhte Secretariat Conference Hall, New Secretariat Complex-ah an thukhawm.

He meeting-ah hian  kum 2010-2011 chhunga Ministry of Home Affairs, (Deptt. of Border Management), Govt. of India-in ramri tihmasawnna atana cheng nuai 2506 Mizoram sawrkar hnena a pek chu ramri hrula awm Rural Development (RD) Block  sawmparuk (16) ten tangkai taka an hman theih dan tur ngaihtuahin Annual  Action Plan thlirhona neih a ni a. Kum 2010-2011 chhunga he pawisa fai hmanga hmasawnna hna hrang hrang thawh dan tur ruahman fel a ni. Hnathawh tura ruahmanna he meeting in a siam leh pawmpui te hi Ministry of Home Affairs, Govt. of India-in a lo pawmpui turin thawn thlak leh a ni ang.

He meetingah hian BADP huam chhunga district paruk; Lunglei, Saiha, Lawngtlai, Champhai, Serchhip leh Mamit a Deputy Commissioner te leh an aiawhte bakah DIG Assam Rifles leh BSF te, leh Department kaihhnawih hrang hrang  aiawh Officer-te an tel a ni.