Vawiin chawhnu dar 1 : 30 Pm khan Saiha District Legal Service Authority leh Mara Students’ Organisation te tangkawp in an huaihawt “Law Day” chu I&PR Conference Hall, Saiha-ah hman a ni.
He programme hi Pu FC Khihnia, President, M.S.O. Headquarters Saiha leh Advocate nibawk chuan a kaihruaia Pu N.Vabeiratlua I&PRO Saiha leh Patron M.S.O. Headquarters Saiha nibawk chuan hunserh a hmang a ni. He Ni hmanna a Resource Person Pu Laldinpuia Tlau Member Secretary, SDLSA chuan Mihring hmanga sumdawnna “Human Trafficking” tih thupui hmangin thu a sawi a, he human Trafficking hi naupang ten an tuar nasat bik thu leh a lo chhuahna bul bera lang chu retheih lutuk vang a ni, a ti bawk. He Human Trafficking hi thlemna, vauna, thamna leh bumna hmanga lo thleng thin anih thu sawiin mihring hmanga sumdawnna hi dan chuan a khap tlat a ni, a ti bawk.
khawvel hmun hrang hrang a mihring hmanga sumdawnna lo thlen dan te tarlangin fimkhur a tul thu a sawi a ni. Mihring hmanga sumdawnna hi Kutdawh tur te, Hmeichhiat mipat hmanna atan te leh Pawisa-a tlanchhuah tur atan a an hman thin thu a sawi a ni.
He Ni hmanna ah hian Saiha khawpui chhung School hrang hrang atangin zirlai 200 vel an kalkhawm a, zawhna leh chhanna hun te neih anih bakah Programme karlakah zaithiam zai te ngaihthlak a ni a, Pu Vabeirona Hlychho, General Secretary, M.S.O. Headquarter’s Saiha chuan lawmthu sawina neiin he programme hi a titawp a ni.
