BADP sum cheng nuai 10 senga sak thar Saiha Press Club chu vawiin chhun dar 12 khan hawn a ni a, Khuallian Pu N.Chakhai, Project Director, DRDA, Saiha chuan hawnna thu sawiin Saiha District MJA ten hun rei tak atanga an lo nghahhlelh em em anmahni puala Press Club an nei ve thei ta chu a lawmpui thu a tarlang a, district tan hmasawnna ropui tak a tling a ni, a ti. Vawiina Club building hawn thar hi kawng an chung a ni a, Office tura ruahman a ni a, a chungah Conference Hall sak chhunzawm tura ruahman chu PD, DRDA chuan theihtawp lo chhuahpui a tum thu a hrilh bawk. Sorkar hmalakna leh ruahmanna hrang hrang te hlawhtlin lehzual nan MJA te chu thawhpuiah sawmin theihtawpa sorkar tawiawm zel turin a chah bawk. Khuallian hian Club-a dah tur Steel Almirah chu lo ngaihtuahsak a tiam nghal bawk a ni. Club hlanna hun hmangtu Rev.S.T.Zawsi, Moderator Elect, ECM pawhin MJA member te chu mipui zirtirtu, kaihruaitu leh hrilh bengvartu an nih anga khawtlang nun honaa a chhe lai siamthatu ni tura tan la chhunzawm zel turin a chah bawk.

 

 

  
A building sak enkawltu Saiha MJA President Pu B.Dawpho chuan report pein Electric wiring leh tui connection te pawh Power & Electricity leh PHE Dept. ten a tul anga an buaipui zel thu a tarlang a, MJA te dinhmun harsatna hriatpuia tanpuitu te zawng zawng chungah lawmthu a sawi bawk a ni.

Press Club hawnna inkhawm hi Vice President Pu C.Z.Hluna’n a kaihruaia, Pu C.L.Zama, Information Secretary chuan lawmthu sawina hun hmangin Saihaa Press Club hmun atana I&PR department-in hmun tha tak an pek avangin lawmthu a sawi bawk a ni.

Saiha District ah hian tunah MJA member 15 an awm a, chanchinbu 11 leh cable operator 3 an awm mek a ni.