Vawiin chawhma dar 11:00 khan Vana Pa Hall, Aizawl-ah Central YMA buatsaih YMA Kumpuan ‘Khawtlang nun siam that’ hawnna inkhawm neih a ni a, hetah hian Pu R.Lalzirliana, Home Minister chu Khuallian niin kumpuan a hawng.

 

 

Pu Zira chuan, “Khawtlang nun siamthat, kumpuan thupuia kan hmang hian kan Mizo Society tana thahnem ngaihna nasat zia leh chumi ruala kan khawtlang nun chhiat tawh zia a lantir tel thei ang, kan ram tlu chhe mek chhanchhuak tura hmalak kan tum hi a phur awmin a thlamuan thlak a ni,” tiin YMA kalkhawmte hnenah a sawi.

Home Minister chuan Mizoram chu a thim zawnga thlir chuan Kristian State inti si, sual em em vek, ringtu tak tak awm ta lo ang maiin kan inchhuah ta thin a, kan thalaite chu rui thin hlir, hmeichhiat mipatna lama kal sual vek ta mai, HIV AIDS te pawh pung vak vang angin lang mahse, Baal hma a thingthi ngai lo tam tak la awmte hian chhanchhuah hna lungrual takin kan thawh chuan ngaih thatna a siam thin a, beiseina sang tak kan nei a nih thu a sawi.

Ram tana hnawksak ber ni a lang chu ruihtheih thli a nih thu sawiin Pu Zira chuan hmana YMA kumpuanah ‘Ruihhlo Do’ tih chu uar takin kalpui a ni a, YMA te pawh famkim vek kan nih bik loh avangin sawi sep sep te awm mahse, nunna tam tak, chhungkaw keh chhe tur phuar khawm leh a awm tam tak an awm. Eng pawh ti dawn ila, mi in min awih theihnan mahni insiam that phawt a pawimawh thu a sawi bawk.

“AIDS emaw hlemhletna kan dona turah pawh ‘takna’ leh ‘tumruhna’ nen i bei ang u” tiin YMA din chhan te sawiin, Pathian thu anga mipat-hmeichhiatna hman leh ram thatna tura mimal tinte nun hman dik, midangte tana phurrit nilova, malsawmna nih zawk, kut tling lova thil neih zahthlak a ni tih hriat te hriat nawn a pawimawh thu a sawi bawk.

Vawiin kumpuan inkhawm hi Pu Lal Chungnunga, President, CYMA chuan a kaihruai a, Report Pu Lalbiakzuala, G.S., CYMA hnen atangin ngaihthlak a ni, hunserh PU Vanlalrema Rokhum, CEC in neiin, Pu C.Zoramliana, CEC leh Pu JH Zoremthanga, CEC te present chu ngaihthlak a ni bawk.