Primary Zirtirtu inzawmkhawm pawl " Primary Teachers Association " Saiha District te chuan nihnih chhung awh tur General Conference vawi 25-na chu vawiin Dt 19.5.2009 chawhma dar 10:00 khan New Colony Primary School- I Saiha-ah an hmang.

He General Conference hi Pu H.C. Seihia, President, PTA Saiha chuan a kaihruaia, hunserh Rev CH.Chhama, Sr. Executive Secretary, E.C.M. Headquarters Saiha chuan a hmanga. Khuallian ah Pu K. Hrahmo,  Executive Member i/c Education, Mara Autonomous District Council chu hman a ni. Thu sawiin Khuallian chuan PTA Saiha District ten an Conference neih na-a Khuallian atan an sawm chu lawmawm a tih thu a sawi a, zirna bultan na School pawimawh ber chu Primary School hi a ni, tiin naupang enkawlna leh kaihhruaina kawngah zirtirtu ten mawhphurhna sang tak an nei ani, a ti a, an lo than len zelna turah pawh kawng thui tak kawhhmuh theitu leh an hlawhtlin leh hlawhtlin lohna ah pawh mawhphurhna sang tak an neih thu a sawi bawk taimakna , rinawmna leh chhelna nen thahnem ngai taka zirtir hna thawk tur leh an nun dan pawh zirlaite tana entawntlak ni turin a chah bawk a ni. Mara Autonomous District Council hnuaia Education Department hmalakna leh hmachhawp mek chi hrang hrang te sawilang in Mara ramah Middle School 13 sak belh tum anih thu leh Primary School pawh BRGF leh SSA pawisa hmangin engemawzat sak belh tum anih thu a sawi a, tun dinhmunah Primary zirtirtu 567 regular an awm thu leh EVS leh SSA hnuaiah zirtirtu 187 an awm thu a sawi bawk. Zirtirtu te tan mithiam thlan chhuahte ruaia English zirna pawh zirtirtute neihpui thuai tum a nih thu a sawi bawk a ni.

He Conference ah hian Saiha District chhunga Primary School 122 atangin zirtirtu mi 250 lai an tel a, Pu J.Beicho, General Secretary, PTA, Saiha hnen atangin report ngaihthlak a nih bakah kum kalta chhunga member boral tate sunna hun neih a ni bawk. Programme kar lakah zaithiam zaite ngaihthlak ani a naktukah hruaitu thar thlanna neih a ni ang.