Mizoram Sawrkar chuan kan thalai tam zawkten India ram venhimna kawnga thawktu (Armed Forces)-a hna sang zawk an chelh theih hi a hmathlir leh duh dan a ni a. Hemi tihhlawhtlin theihna atana thil tul leh pawimawh tak pakhat chu kan thalai leh zirlaite hemi kawnga kaihhruai leh tah hriam hi a nih avangin ram chhunga Sainik School din hi Sawrkar chuan tihmakmawh a ni tih a hria a. Chumi tihlawhtling tur chuan Mizoram Sawrkar chuan hun engemaw chen kalta atang khan nasa takin hma a la a, Central Sawrkar-a he lama mawhphurtu hrang hrang — Ministry of Defence, Ministry of DoNER, Ministry of Finance, etc.-te chu a dawr kual a. Central Sawrkar chuan kan mamawhnate hriain Sainik School Chhingchhip sakna atan hian Thirteenth Finance Commission (TFC) atangin Rs. 4,500 lakh leh Non-Lapsable Central Pool of Resources (NLCPR) atangin Rs. 5,064 lakh min pe a. Heng sumte hmanga Sainik School din tura hma la zelin school sakna tur ramte en kual a ni a, vanneihthlak takin Chhingchhip khuaa chhungkaw 42-te chuan an ram 212 Ha-a zau chu a thlawnin Sawrkar an pe a, ram petute chungah Sawrkar pawh a lawm hle a ni.
Sainik School satu tur hian Central Sawrkar hnuaia Work Agency pakhat, Hindustan Prefab Ltd. (HPL) chu ruat niin, anni hian Sainik School Chhingchhip sak hna hi an thawk ta a ni. Hetih lai hian Sainik School Society, Ministry of Defence, Government of India chuan State Sawrkar, Sainik School din turten hmunhma leh building (Minimum Infrastructure Requirement) an neih ngei ngei tur bituk a nei a. Chungte chu State Sawrkar-in a peih fel a ni tih tichiang turin ni 4. 11. 2016 (Zirtawpni) khan Honorary Secretary leh Inspecting Officer, Sainik School Society-ten an rawn endik a. State Sawrkar hmalakna chu tha tawka ngaiin Government of India, Ministry of Defence chuan Sainik School Chhingchhip chu nakum (Academic Session) atanga school tan turin phalna a rawn pe ta a ni.
Sainik School Chhingchhip hi Class-VI atanga tan tur a ni a, he school-a lut turte chuan Sainik School Society, Government of India, Ministry of Defence-in 2017-2018 All India Entrance Examination a buatsaih an hmachhawn a ngai dawn a. He exam-a inziak tlingte chuan Interview leh Medical Examination an hmachhawn bawk ang a, heta tling leh tithate atang hian Final Merit List siam a ni leh ang. Sainik School Chhingchhip tan nan hian zirlai (cadet) 30 lak tum phawt a ni a. Entrance Examination hi State chhunga candidate-te tih that dan azirin hei aia tam pawh hi lak theih a ni.
Sainik School Society, Government of India, Ministry of Defence-in 2017-2018 All India Entrance Examination programme a duan chu hetiang hi a ni -
1. Prospectus/Admission Form hralh hun : 16-30 November, 2016.
2. Application Form thehluh hun tawp : 10. 1 2. 2016
3. Entrance Examination neih hun : 15. 1. 2017
4. Roll Number-wise-a Interview, Medical Examination hmachhawn tur Merit List puan leh Call Letters chhuah hun : 8.2. 2017
5. Interview leh Medial Exam neih hun : 20. 2. 2017 to 6. 3. 2017
6. Final Merit List leh Waiting List puan : 13. 3. 2017
Prospectus/Admission Form hi mahni bialtu Sub-Divisional Education Officer office atangin Rs. 250/-in Scheduled Castes/Scheduled Tribes-te tan lei theih a ni a, Admission Form hi a chunga hun tarlan ang khian Director, School Education-ah thehluh leh tur a ni.
Sainik School Chhingchhip hi a nihna ang taka hman tangkai a nih theih nan Mizoram Sawrkar chuan tlawmngai pawl leh zirlai pawl hrang hrang — CYMA, CYLA, MTP, YCA, MZP, MSU, HSA, SSP, MSO, LSA, SSPP, RSO leh PZP-te chu zirlai leh thalaite zinga hma lo la turin a ngen tak meuh va; tin, zirlai nu leh pate pawhin ram chhunga he zirna in kan neih thar hi Sawrkar hmathlir ang taka hmang tangkai thiam turin a ngenin duhsakna a hlan a ni.
