1664/2024-2025

Saitual, the 20th August, 2024: Vawiin chawhma dar 11:00 am khan DC Conference hall, Saitual-ah District Bawrhsap Dr. Lalngura Tlau kaihhruaina hnuaiah District AIDS Prevention & Control Committee, Saitual District chuan HIV/ AIDS leh STI Campaign chungchanga rally neih dan tur relin an thu khawm.  

India rama HIV/ AIDS programme khaikhâwmtu National AIDS Control Organization (NACO), Government of India chuan India ram state tina district zawng zawng leh thingtlang kilkhawr thlenga HIV/ AIDS chungchang zirtirna beihpui (Intensive IEC Campaign- India Fight against HIV/ AIDS and STI’s) thlak tura District tina District AIDS Prevention & Control Committee-te chu hriattir an nih angin, Saitual-ah pawh Committee member te hian rally neih dan tur leh hmalak dan tur an rel a ni.  

He hunah hian Member Secretary, Dr. Zothanpari Chhakchhuak, District AIDS Control Officer ni bawk chuan HIV/ AIDS chungchanga Saitual District dinhmun te sawiin, HIV/  AIDS dona kawngah a district ang pawha tan lak a ngaih nasat thu a sawi. He thutkhawmna kaihruaitu Saitual Bawrhsap, District AIDS Prevention & Control Committee Chairman ni bawk,  pawhin he campaign hi a hlawhtlin ngei a beisei thu sawiin, rally neih dan tur an rel ho nghal a ni. 

HIV/ AIDS Rally leh a kaihhnawih intihsiakna leh activities hrang hrangahte district-a middle, high school, higher secondary, college leh technical institutions-a zirlaite chu tel tura beisei an ni a, zirlai naupangte chu heng :- placard insiamsiak, extempore speech, stall insiamsiak leh flash mob dance-ah te an inel dawn a ni. 

NACO-in a lo ngen tawh angin thingtlang school naupangte hnenah HIV/ AIDS lama hnathawktute (PATH, Link Workers staff-te) chu anmahni khaw huam chhung theuha HIV/AIDS leh STI chungchanga zirtina pe tura tih an ni. He campaign hun chhung hian college/ technical institutions tinah zirtirna kalpui tur a ni a, hemi tur atan hian counsellor emaw thiamna nei bik (resource person) ruahman tura rel a ni.  

HIV/ AIDS & STI chungchang zirtirna hmanrua (pamphlet/ leaflet/ booklet) te hi in tina sem tura rel niin, YMA leh Kohhran bulletin kar tin chhuaka sem tel tura tih a ni. Hei bakah hian District huam chhungah khaw hrang hranga service sumo/taxi/auto-ah te HIV/ AIDS & STI chungchang zirtirna sticker bel bawk tur a ni. Heng hmanruate hi MSACS atanga dawn tur a ni ang.    

He thutkhawmnaah hian District AIDS Prevention & Control Committee Chairman District Bawrhsap, Member Secretary leh Committee member-te kim takin an kal a. Committee member te chu Saitual District chhunga – SP, Addl. DC, DEO, Saitual Town Joint VC, MUP President, MHIP Sub-Hqrs President, YMA Sub-Hqrs President leh kohhran hrang hrang aiawh hotute an ni. Member te chuan rally neih dan tur, a hun leh a hmunte bakah budget hman dan turte sawi ho nghal a ni.