1926/2024-2025

Saitual, the 5th September, 2024: Vawiin chawhnu dar 2:00 pm khan Saitual Bawrhsap Dr. Lalngura Tlau chuan Saitual district chhunga zirtirtu tha chawimawina dawngtute a Pisa-ah lawmpuina leh thingpui inhona hun a hmanpui.

He hunah hian Dr. Lalngura Tlau chuan kalkhawmte chu Zirtirtu Ni chibai a buk a, Saitual district chuan zirtirtu chhuanawm tak tak, National, State leh District Awardee an nei thei chu lawmawm a tih thu a sawi a. Bawrhsap chuan zirtirtute pawimawhna chungchang chu uar taka sawiin, zirtirtu indaih lohna avanga harsatna tam tak awm thin chu a pawi a tih thu sawi a, Awardee-te chu naupang zirtirna kawngah theih tawp chhuah zel turin a chah nghal a ni.  

District Education Officer (DEO) Pu K. Lalnunfela chuan zirtirtute inpekna chu ropui a tih thu a sawi a, zirtirtu chu naupangtea chhia leh tha hriatna tuhtu pawimawh tak an ni a ti a. Zirtirtu thenkhat inthlahdahna avanga hmingchhiatna thleng thin chu pawi a tih thu a sawi a, chutih rualin zirtirtu thahnemngai, hnathawh hunbi pawh sawi loa hna thawk thin tam tak an awm thu a sawi. DEO chuan zirtirtute chu an kal lehzelna turah duhsakna a hlan nghal bawk a ni. 

National Awardee (2016) Pu R. Lalthasiama, State Awardee (2024) Pu T. Lalramnghaka Head Teacher, Govt. Selchhunga Primary School, Saitual, District Awardee – Pu Zionthanga, Prinical, Presbyterian English School, Keifang (2021) Pu Caleb Lalhmachhuana, Principal, District Higher Sec School, Keifang (2022), Pu G. Lalhriatpuia,Teacher, Govt. Middle School, Tawizo (2021), te chuan thu sawiin zirtirtu an nih anga an tawnhriatte leh an veizawngte sawina hun an hmang a. Saitual chhunga officer te chuan he hun hi an hmanpui bawk a ni.