2461/2025-2026

Saitual, the 17th September, 2025: Vawiin khan DC Conference Hall, Saitualah District Bawrhsap Dr. Lalngura Tlau chuan September ni 17 atanga October ni 2 thleng awh tur faina beihpui thlakna “Swachhata Hi Seva 2025” Campaign a hawng.

He hunah hian khuallian Dr. Lalngura Tlau chuan thu a sawi a, Saitual District-a DUDO leh SDO, PHE te inpekna leh thawhrimna chu fakawm a tih thu a sawi a, khawtlang hruaitute, VC te leh Saitual Town Sanitation Committee te pawhin theih tawpa hma an lakpui thin avangin lawmthu a sawi bawk a ni.

Bawrhsap chuan kumin thupui "Swachhotsav" chuan mipuite bawlhlawlh awm lo thei ang bera kutpui leh intihhlimna huaihawt tura infuihna leh faina kawnga tanrual pawimawhna a entir tih a sawi a. Children's Sanitation Club din a ni chu lawmawm a tih thu sawiin, naupangte chu an tet lai atang faina lam inzirtir a pawimawh a ni, a ti. Bawrhsap chuan kalkhawmte chu faina mai bakah thingphun uar kawngah te theih tawp chhuah zel turin a sawm a ni.

Swachhata Hi Seva hi Ministry of Housing & Urban Affairs leh Mizoram Sorkar-a UD&PA Department hmalaknain kum 2023-2024 ah neih a ni tawh a, kuminah pawh hian September ni 17 atanga October ni 2 thlenga neih tura ruahman a ni.

He faina beihpui hawnna hun "Campaign Roll out"-ah Er. Laldinsanga Hnamte, DUDO chuan hmalakna tur duan sa te a tarlang a, chungte chu:

1. Cleanliness Target Unit (CU): Hetah hian vantlang hmun pawimawh, bawlhhlawh awm tamna hmun, faina beihpui thlak pawha tih fai harsatna laite, chung kan tih fai loh avanga kan hriselna ten a tawrh palh theihna hmun tih fai te a ni. CTU hi portal-a upload a tul avangin 14th September-ah khan department lamin hmun thum: Saitual Chawnpui Veng CTU, Saichal Peng CTU leh Sihfa CTU-te thlan fel tawh a ni a, thlalak pawh GPS coordinates nen portal-ah upload fel vek tawh a ni a, tih fai hnu thlalak hi upload leh tur a ni.

2. Clean Public Spaces: Hemi hnuaiah hian vantlang hmun pawimawh tihfai hna thawh tur a ni.

3. ⁠Clean Green Utsav Activities: Hemi hnuaiah hian bawlhhlawh paih tur awm lohna (Zero Waste) Festival leh events buatsaih te, RRR (3R) Centre buatsaih leh Waste to Art Exhibition buatsaihte, Street Vendors te leh khawtlanga eitur pe chhuaktu Hotel, restaurant te chu thianghlimna leh faina nena hma la tura hrilhhriat te a ni.

4. ⁠Suraksha Shivirs: Hemi hnuaiah hian faina kawnga hnathawk tute Free Health Check up neih tur a ni ang a, Health Deparment lam te nena tangkawpa tih tur a ni.

5. ⁠Shramdaan: Hemi hnuaiah hian khawpui chhung tihfaina tur atana Faina Hnatlangpui (Mass Cleanliness Drive) neih tur a ni.

Heng hmachhawp hrang hrang te UD&PA dept, VC te leh Sanitation Committee te tanghoin Saitual Town Area-ah September ni 17 atanga October ni 2 thleng kalpui a ni ang. He Campaign kharna hun "Swachhata Diwas" hi October ni 2, 2025-ah neih a ni dawn a ni.

Vawiin Swachhata Hi Seva 2025 Campaign roll out hi UD&PA department leh PHE department tangkawp buatsaih a ni a, UD&PA lamin town area-ah te faina beihpui hi an kalpui anga, PHE department in thingtlang (gramin) lamah an kalpui thung ang. Inkhawm hi Er. Laldinsanga Hnamte, DUDO, UD&PA chuan a kai hruai a, thusawi hi khuallian Dr. Lalngura Tlau atanga ngaihthlak niin Pu Lalzuala, SDO, PHED, Saitual WATSAN sub-division chuan nikum lama an hmalakna te report pein, an hma chhawp te a tarlang nghal a ni. Pi F. Lalruatkimi, Inspector of Sanitation, UD&PA-in lawmthu sawinain a khar a ni. Naktuk lamah Phullen leh Ngopa RD Block-ah te campaign roll out hi neih a ni ang.