2462/2025-2026

Dated Aizawl: the 17 September 2025 : Vawiin khan Urban Development&Poverty Alliviation Department Minister Pu K. Sapdanga chuan Sad Conference Hall, Mineco-ah, ‘Blending Community action & Spiritual Action’ tih thupui hmanga17 September atanga 02 October 2025 thleng awh tur Swachhata Hi Seva Campaign 2025 chu khuallian niin a hawng.

Campaign hawnnaah hian khuallian UD&PA Minister Pu K. Sapdanga chuan thusawiin, India ram puma kan chheh vel hmunte tihfai beihpui thlak puala inzirtirna hun, ‘Swachhata Hi Seva’ Campaign a hawng thei chu lawmawm a tih thu a sawi a. Faina kawnga tan lak chu phurrit a la lova, thil hlimawm leh hun nuam tak anga hmang zawk turin kalkhawmte chu a sawm a, chu chu kumin Swachhata Hi Seva thupui pawhin a tum a ni tih a sawi a. Mahatma Gandhi pawhin, “Faina chu zalenna ai pawha pawimawh zawk a ni’ a tih thu sawiin, Minister chuan Mizote pawhin faina chu a nun a kan nunpui a hun tawh tak zet tih a sawi a. Kalkhawmte chu midangte thinlungah 'faina chu mi tin tan a ni' tih chu pu darh theuh tur leh Swachhata Hi Seva 2025 chu hlawk taka hmang theuh turin duhsakna a hlan nghal bawk a ni.

He hunah hian Pi Teresy Vanlalhruaii pawhin thusawiin, Faina chu mi tinte mawhphurhna a nih thu leh kumin Swachhata Hi Seva thupui, ‘Blending Community Action and Festival Spirit chu’ Mizote hanm nunphung nen pawha inhmeh tak leh mipuite thinlungah pawh awmze thui tak nei thei tur a nih thu a sawi a ni.

Swachhata Hi Seva hi ni 15 (September 17-October 02) thleng awh tur a ni a. He hun chhung hian Cleanliness Target Unit (kan chheh vel hmun kilkhawrte) tifaia hun hman tur a ni. Kumina Swachhata Hi Seva thupui, “Blending Community Action and Festival Spirit” hian, faina beihpui thlak chu a hlimawm zawng leh phurawm taka kalpui a tum a ni.

Vawiina Swachhata Hi Seva Campaign 2025 hawnna hun hi Pu Lalmalsawma Pachuau, UD&PA Secretary chuan kaihruaiin, kalkhawmte lawmna thu a sawi a. Pu Jacob Lalawmpuia, Director, UD&PA Department chuan Swachhata Hi Seva chungchang a sawifiah bawk a ni.