2228/2023-2024

Dated Saitual the 9th October 2023: Vawiin ah Election Commission of India in in Mizoram MLA inthlanpui 2023 neih hun tur a puan tak avangin election chungchang a Saitual District inpuahchahna leh hmalak dan tur chungchang ah District Election Officer chuan chuan thuthar la khawmtute a kawmna hun a nei a ni.

Dr Lalngura Tlau, District Election Officer chuan Saitual District chu District thar pathum zinga tel, District naupang te, MLA inthlanpui pawh a vawi khat hmachhawnna tur nimahse an bial chhungah Assembly constituency pathum lai a awm thu sawiin voters pawh mi 55674 lai anni a, AC te hian Saitual District pawn lam thleng a huam avangin inbustaihna a ngawrh hle thu a sawi.

District Election Officer chuan Election kaihhnawih a committee hrang hrang pawh din a nih tawh thu sawiin vawiin la la hian Sector magistrate te chuan Saitual Town area chu an fan kual tan nghal thu a sawi.

Dr Lalngura Tlau chuan election kaihhnawih meeting leh training hrang hrang pawh kalpui mek a nih thu sawiin, District thar a nih avangin infrastructure ah, a bik takin building te duhthusam in a awmlo a, amaherawhchu theih ang anga insiam rem ani a, election khaihlak lo a felfai taka kalpui theih ngei beisei a ni, a ti a. Khawtlang, NGO leh Political party hruaitute nen pawh thawhhona tha tak an neih ngei a beisei thu a sawi.

Pu Lallawmawma RO, Addl DC Saitual ni bawk pawh in thu sawiin election expenditure chungchang a pawimawh zia a sawi a, hemi kawngah hian party aiawhte pawh a thil tul, an hriat tur a pawimawh te hrilhhriat tawh an ni, a ti. Hemi bakah hian vantlang hmuna banner leh candidate thlalak tar chungchang ah te pawh inhrilhhriatna tha zawk neih a pawimawh hle a ni, a ti.

Vawiin press conference ahhian thuthar la khawmtute leh khawtlang leh NGO hruaitute an tel a; ARO, election officer Saitual, DIPRO leh RO te an tel a ni.