4776/2025-2026

Saitual, the 11th March, 2026: Vawiin khan District Agriculture Office, Keifangah, Pi Hmangaihthangi Renthlei, DAO kaihhruainain Tung chi semna hun hman a ni a, Saitual Bawrhsap Pu Srinivas Sadi chu khuallian niin Tung chi semna hun a hawng nghal a ni.

He hunah hian khuallian Pu Srinivas Sadi chuan thu a sawi a, Tung chu Saitual District-a a awm hnuah chiah a hriat thu sawiin, August ni 4, 2024-a din Saitual District Tung Grower Association chu Association la naupang tak ni chunga hma ṭha taka an la thei chu fakawm a tih thu a sawi bawk.

Khuallian chuan Tung chingtute chu DAO kaltlangin an harsatna leh mamawhnate thlen thin turin a chah a, sawrkar lam atangin pui tura an inhawn reng thu sawiin, an kal lehzelna turah duhsakna a hlan nghal bawk a ni.

October ni 8, 2022 khan Saitual Tung Grower Association din a ni a, April ni 29, 2023 khan RZ Foundation kaltlangin Galaxy surfactant limited Mumbai te nen kum 3 atan inremna ziah a ni. District chhunga khaw dangte huap zau zawk turin Saitual District Tung Grower Association chu August ni 4, 2024 khan din a lo ni ta a ni.

Tung hriak hi bungrua (furniture) tih tletna atan te, varnish, paints leh leather tih tletna atan te leh thil dang hrang hrangah an hmang nasa hle a, chin a nih atanga kum 3 bawr velah an rah tan thei a, kum 30 bawr vel thleng an rah thei a ni.

Vawiin Tung chi semna inkhawm hi Pi Hmangaihthangi Renthlei, DAO chuan a kai hruai a, Saitual Bawrhsap Pu Srinivas Sadi chu khuallian niin thu a sawi nghal a ni. Saitual Tung Grower Association atangin report tawi ngaihthlak a ni a, Pu Lalchhuanawma, ADAO chuan lawmthu sawinain hun a khar a ni.