4777/2025-2026

Dated Siaha, the 11 March, 2026: Vawiin chawhma dar 11:00AM khan District Rural Resource Centre, DRDO office Siahaah International Women's Day pualin ‘Hmeichhiate thu thlen ngaihthlakna hun’ “Mahila Jan Sunwai” (Public Hearings) hman a ni a, he hun hi Pi Vanlalhlupuii Fanai, Member, Mizoram State Commission for Women chuan kaihruaiin, Pu VL Hruaizela Khiangte, District bawrhsap chuan a hmanpui bawk.

Pi Vanlalhlupuii Fanai chuan hun hlu tak senga kal khawmte lawmna thu sawiin, ‘sawrkar laipui hian hmeichhiate a ngaihsakin a humhalh ṭha em em a, chuvangin rampum huap commission a din bakah state leh UT tina din turin hriattirna a tichhuak a. India danpui bakah dantesep hrang hrangah hmeichhiate chungchang tarlanna siamṭhat ngai lai a awm em, hmeichhiate humhalhna ṭha taka kalpui a ni em tih uluk takin a ngaihven reng ṭhin a ni,’ a ti. Mizoram state commission for Women hmalakna tlangpui Pi Vanlalhlupuii Fanai hian tarlangin, nikum thleng khan thubuai (case) 143 chinfel ni tawhin, Aizawl khawpui pawn - Lawngtlai, Lunglei leh Champhai aṭangin mi pakhat ṭheuh Mizoram state commission for Women-ah telh an ni a, hei hian hmalakna a tichakin a ṭangkai em em a ni,’ a ti bawk.

Pu VL Hruaizela Khiangte, District bawrhsap pawhin thu sawiin, ‘Hmeichhiate hmakhua ngaia thawktu district chhunga awm zawng zawngte hmalakna fakawm a tiin, an hmalakna avangin mi tam takin hahdamna an chan a rin thu a sawi.’ Dan anga kalpuia hmalak theihna thil a tam tawh thu District bawrhsap hian sawiin, chutih rualin mi pakhat dikna chanvo a vawng lurh bik chuan a dik lo va, mi zawng zawng dikna chanvo inzahsaka inhriatthiam tawn hian nunho a nuamin khawtlang leh ram nuam tak kan siam thei dawn a ni, a ti.

Mizoram State Commission for Women, Deputy Commissioner Office, Superintendent of Police Office, leh hmeichhiate hmakhua ngaia thawktute ṭangho buatsaih Mahila Jansunwai (Public Hearing)-ah hian department official bakah tlawmngai pawl aiawh leh khawtlang hruaitute an tel a. Thubuai (case) pahnih ngaituah niin, an harsatna thlente hi chinfel dan kawng zawn sakin a ṭul anga hmalakpui a ni.