2252/2026-2027

Saitual, the 17th September, 2026: Vawiin khan DC Conference Room, Saitualah District Mineral Foundation (DMF) Governing Council Chairperson leh District Bawrhsap ni bawk, Pu Srinivas Sadi kaihhruaiin District Mineral Foundation Fund atangin Saitual District-a primary school pali te hnenah computer set hlan a ni.

He hunah hian District Bawrhsap Pu Srinivas Sadi chuan thu sawiin, ramin hma a sawn theih nan hriselna leh zirna tihhmasawn a pawimawh a ni, a ti a, Mizoram Primary Teachers' Association ten an mamawh te an rawn thlen avangin an chungah lawmthu a sawi bawk. Bawrhsap chuan primary school tihhmasawnna tur sawrkar laipui atang scheme rua hman a nih thin loh avangin District Mineral Foundation (DMF) Fund remchang taka hman tur a lo awm chu lawmawm a tih thu a sawi a, zirtirtute leh zirlaite pawhin an computer set dawn te chu tangkai taka an hman theih nan duhsakna a hlan nghal a ni.

Saitual District Mineral Foundation (DMF) Governing Council chu tum hnih an thu khawm tawh a, DMF fund hman dan tur te rel thin niin, Primary school thlan chhuah pali, Govt. Lamherh P/S, Govt. Luangpawn P/S, Govt. Vanbawng P/S – II, Govt. Phuaibuang P/S II-te hnenah vawiin khan computer set leh printer te hi hlan nghal a ni. DMF fund-te hi mining permit/mining lease leh fine/penalty hmanga royalty Sawrkara chhungtuten an royalty chhun luh atanga 10% zel an pek belh atanga tling khawm a ni.

Vawiin thutkhawm hi District Bawrhsap Pu Srinivas Sadi chuan a kai hruai a, Pu J. Lalawmpuia, SDC chuan report tawi pein, a duh apiang tan thu sawina hun hawn a ni a, Pu Laldingliana, DEO & DPC chuan lawmthu sawiin hun a khar a ni.