2253/2026-2027

Aizawl the 17th September, 2026: Vawiin chawhma khan UD&PA Department leh PHE Department tangkawp buatsaih State Level Launching of Swachhata Hi Seva 2026 chu UD&PA Auditorium, MINECO ah neih a ni a. UD&PA changtu Minister Pu K. Sapdanga chu khuallian niin PHED Minister Prof. Lalnilawma chu khual zahawm a ni.

UD&PA Minister Pu K. Sapdanga chuan faina nunpui turin kalkhawmte a sawm a; zirlaite chu an nu leh pa, pi leh pute faina kawnga kaihruaitu ni turin a chah. Minister chuan faina kawnga beihpuithlakna kawng tha ber chu zo nun mawi - Tlawmngaihna atanga bul tan hi a ni, a ti a. Swachh Bharat Mission (U) hmalakna, ‘segregation at source’ – mahni in ngei atanga bawlhhlawh thliar hran hi zawm ngei turin mipuite a chah a ni.

Khual zahawm PHED Minister Prof. Lalnilawma chuan fai hi hriselna leh changkanna a ni, a ti a. Tuithianghlim leh hriselna chu thil inzawm tlat an nih thu sawiin, mi dang tihtura dah lovin mahni ngeiin faina bul tan turin mi tinte a sawm a ni.

Swachhata hi Seva 2026 hi September ni 17 atanga October ni 17, 2026 chhunga hman tur a ni a. Hemi hun chhung hian India ram pum huapin Faina leh Thianghlimna kawnga beihpui thlakna neih a ni ang. Mizorama District khawpui zawng zawng bakah notified town leh thingtlang khua zawng zawngah Faina Beihpui thlakna lian tak neih a ni dawn a. Campaign chhung hian faina kawnga hmalakna hi school, zirna in, bazar hmun, tuikhur, mipui punkhawmna hmun, vengchhung leh mahni in bul bakah zun in leh ek in tihfai beihpui thlak tur a ni. SHS 2026 pual hian zirna inah te faina hnatlang bakah faina lam hawi intihsiakna leh inhrilhriatna hun hman tur a ni dawn a. Faina kawnga hma latu sanitation worker te chawimawina hun leh health check-up buatsaih a ni bawk ang.

Swachhata Hi Seva 2026 hawnna hi District tinah vawiin hian neih niin, he campaign hi sawrkar department hrang hrang, tlawmngai pawl te leh khawtlang mipuite nen tangrualin Faina beihpuithlakna hun hman a ni a. He campaign kal zelah hian October ni 1, 2026 hian ‘Ek Din, Ek Ghanta, Ek Saath’ – ‘Faina Hnatlangpui’ chu India ram pumah neih a ni bawk ang. Mizoramah pawh khawpui leh thingtlang khaw tinah kalpui tura ruahman a ni.

Swachhta Hi Seva hmanna pui ber Aizawla neih hi PHED Secretary Pi Zodingpuii chuan a kaihruai a. UD&PA Commissioner & Secretary Pu V. Lalsangliana chuan keynote address a sawi a. UD&PA Director Pu Jacob Lalawmpuia chuan SHS 2026 kalpui dan tur Technical Report a pe a. UD&PA Joint Secretary Pi Zarzokimi kaihhruaiin kalkhawmten faina thutiam (Swachhata Pledge) an chham rual a. Inkhawm hi PHED PMU Director Pu Lalropuia Hmar chuan lawmthu sawiin a titawp a ni.