2254/2026-2027

Aizawl the 17th September, 2026: Vawiin chawhnu dar 2:00 khan Pu Lalnghinglova Hmar, Minister of State, Sports & Youth Services Department chuan MINECO-a a office chamber-ah September ni 13-a Women's Hockey Junior Asia Cup 2026-a champion India team a tel Mizo tleirawl pahnih - F. Lalbiaksiami, Lunglei leh Lalrinpuii, Hnahthial te lawmpuina hun a hmanpui.

Sports Minister Pu Lalnghinglova Hmar chuan, "Hockey hi a khel an tam a, hnamdangte leh ram inelna angah phei chuan champion nih hi thil harsa tak a ni a, chuvangin Asia champion nih hi thil namai lo tak a ni. Mizoram min tihmingtha a, tin, in hlawhtlinna hian Mizote leh infiammi dangte bakah keimah pawh hi min ti phur a ni." tiin India champion pahnihte chu a lawmpui thu a sawi. "Empowering Mizoram Sports kan kalpui mekah hockey kan telh a, theihtawp chhuahin tan kan la zel dawn. India hi hockey-ah a tha a, Mizote tana Olympic thlenga medal hnaihna ber pakhat a ni." a ti.

2026 Women's Hockey Junior Asia Cup hi tun thla ni 4 atang khan China a Moqi Training Base-ah khelh a ni a. Under-20 inelna niin ni 13, Pathianni khan final khelh a ni a, India hi a zawna vawi thum a champion-na niin India hi hlawhtlinna an chan avangin 2027 FIH Junior World Cup khel turin an tling nghal a ni.

"Hockey Mizoramin Thenzawl a academy atangin player tha kan chherchhuak reng a. Player pahnih khat han vawrhchhuah chauh ni lovin a kum bithliah ang zelin a zawnin chherchhuah an nei ta reng a, hei hian kan kaldan a dik tih a ti lang. Kan kaldan a dik tawh chuan a mihring kan neih belh zel tawh dawn a, a zar kan zo zel dawn a ni." tiin Minister chuan a sawi a. "Vawiin hi chu thingpui inhova kan inlawmpuina mai a ni a, inlawmpuina tak tak chu Incentive Cash Award sem hunah in dawng dawn a ni." a ti bawk.

Minister hian sorkarin hockey hmasawnna tura hma a lak hrang hrangte leh hmalak dan tur ruahmanna awmte a sawi bawk a. Kawnpui a Boys Hockey Academy chu Thenzawl lam academy entawn a tih len tum a ni a. Muallungthu Hockey Academy tihchangtlun mek niin sprinkler system atan generator lian lei a ni tawh a. Hei bakah hian PMJVK atangin Hnahthial a hockey ground siamna tur remtihna a awm tawh a, Kolasib-ah India player Lalremsiami hmingin hockey ground siam tura hmalak mek a ni tih a sawi.

Vawiin lawmpuina hunah hian Pu Henry C. Lalrawnkima, Director, Sports & Youth Services Dept. chuan thu sawi bawkin hockey a hmasawnna tura hmalakna awmte chu hlawhtlinna hrang hrang nei thin player kal tawhte leh tuna khelmekte thawhrah zel a nih thu a sawi a, hei hian theihtawp chhuah tura a tihphur thu a sawi bawk.

He hunah hian Hockey Mizoram hruaitute leh player ten report pe in thu an sawi bawk a ni.

Lawmpuina hunah hian Hockey Mizoram lama hruaitute bakah player-te chhungten an telpui a ni.