604/2025-2026

Saitual, the 14th May, 2025: Vawiin chawhnu dar 2:00 khan DC Conference Room, Saitualah, Border Coordination Committee chu an chairman, District Bawrhsap ni bawk Dr. Lalngura Tlau kaihhruainain an thu khawm.  

He hunah hian District Bawrhsap Dr. Lalngura Tlau chuan thu sawiin, Home department atanga ngenna angin Indo-Myanmar Border-a luh leh chhuahna (entry/exit), hungna (fencing) leh hnathawh ngai hrang hrang endik a, a tul anga hma la turin Border Coordination Committee chu din a ni tih a sawi.  

Bawrhsap chuan SDO (C), Ngopa kaihhruaina hnuaiah Border Coordination Sub- Committee din a nih thu sawiin, Assam Rifles leh Border Roads Organisation (BRO) te nen tanghoin hma an la dawn a ni, a ti. Dr. Lalngura Tlau chuan border fencing leh entry/exit chungchang te mipui hnena puanzar leh hrilhhriat kawngah theih tawp chhuah turin kalkhawmte chu a fuih nghal a ni.

Indo-Myanmar border-a Entry/Exit point siamna tur atan hmun sawmpathum (13) thlan chhuah a ni a, chumi zingah chuan Hrianghmun-Tuisa lui, Saitual District chu thlan a ni a. Border Coordination Sub- Committee Chairman, SDO (C), AR aiawh leh BRO aiawhte chuan Hrianghmun-Tuisa lui chu Joint survery neiin, a hungna tur hmun te, entry/ exit point siamna tur te, check post siamna tur ram te an endik ang. Joint survey report hi Border Coordination Committee-ah thehluh niin, Committee hian Home Department lamah an thehlut leh dawn a ni.  

Vawiin thutkhawmah hian Dr. Lalngura Tlau, Border Coordination Committee Chairman & DC, Pi Dorothy Muansangi, Border Coordination Committee Sub-committee chairman & SDO (C), Pu Lallawmawma, Addl DC, Pu J. Rokima Addl SP, Pu V. Laldinsanga, PD, DRDO, Pu Lalthakima Chhangte SDO (S), Pi F. Zodingpuii, DIPRO leh Pu Anil Chhetri, Asst, Comdt, 34 Assam Rifle, Pu Vikash Kumar Singh, OC, 74 RCC/Pushpak te an tel a ni.