571/2025-2026

Saitual, the 13th May, 2025: Vawiin chawhma dar 10:30 khan DC Conference Room, Saitualah, Saitual khawpui chhunga rikrum thil thleng thulha mipui ven himna kawnga chet lak dan tur nunchan zirna (civil defense mock drill) buatsaih dan tur relin Saitual District Level Civil Defense Advisory Committee (DLCDAC) chu an chairman, District Bawrhsap ni bawk, Dr. Lalngura Tlau kaihhruainain an thu khawm. 

He hunah hian DLCDAC chairman Dr. Lalngura Tlau chuan kalkhawmte hnenah lawmthu a sawi a, India leh Pakistan boruak chuan ziawm lam pan rih mahse mipuite chu inralreng renga kan awm a tul a ni, a ti. Dr. Lalngura Tlau chuan van sang aṭanga beihna (air raid) lo thlen thulha ram mipuite himna atana chet lak dan tur nunchan zirna (civil defence mock drill) chu district hrang hranga neih tura tih a nih angin Saitualah pawh a buatsaih dan tur leh chet lak dan tur te sawiho a tul a ni, a ti a. Mipuite an chiai loh nan YMA ten mipuite an hrilhhriat that a pawimawh thu bawrhsap chuan sawiin, mock drill hlawhtling leh hlawhthlak tak an neih theih dan kalkhawmte chu theih tawp chhuah turin a ngen nghal a ni. 

Vawiin thutkhawmah hian DLCDAC chuan eng tihthim (blackout) drill  chu Saitual Town huam chhungah May ni 15 (Ningani) hian neih ni se tih an rel a. Eng hi minute 3 chhung, zan dar 6:30 atanga 6:33 thleng tih thim a ni ang a, hemi chhung hian inverter, battery back up hmang leh solar light hmang eng te pawh chhit loh tur a ni. Blackout Drill chhung hian veng chhung hmun hrang hrangah ‘Siren’ tih rik a ni ang a, lirthei che vel zawng zawng te chu awm hmunah din vek tur a ni.  

Civil defence mock drill chu DLCDAC chuan Saitual Town area-ah May ni 16 (Zirtawpni) chawhma dar 11:00 hian neih ni se tih an rel a, hemi atan hian chanvo leh mawhphurhna hrang hrang changtu tur te ruat nghal an ni.   

Heng hmun panga (5) te hi Mock Drill atan hian ruat a ni- District Civil Defense Control Room atan DC Office, Saitual, Staging area atan FCS&CA Godown, Building kang (fire) atan Govt. Selchhunga P/S, Saitual, Temporary Hospital atan Saitual Public Playgrownd, Bunker atan Saitual Market. Heng hmuna Mock drill kaihruai tur hian Incident Commander ruat theuh an ni a, a pui turin officer leh YMA te ruat an ni bawk.  

Vawiin thutkhawm hi Dr. Lalngura Tlau, DLCDAC chairman leh DC ni bawk chuan a kaihruai a, DLCDAC member te leh zone hrang hranga nodal officers ruatte an tel a ni. Blackout drill leh Civil defense mock drill hi Block level-ah hian Ngopa leh Phullenah te a rem chan dan anga kalpui a ni ang.