70/2025-2026

Saitual, the 7th April, 2025: Vawiin chawhma khan DC conference room Saitualah, Saitual District Disaster Management Authority (DDMA) Chairman, District Bawrhsap ni bawk Dr. Lalngura Tlau kaihhruainain kumin fur lo thleng tura chhiatna hrang hrang thleng thei laka Saitual District himna atana inpuahchahna hrang hrang sawi hovin DDMA member te an thu khawm.

He hunah hian Saitual DDMA chairman Dr. Lalngura Tlau chuan thu sawiin, kum hmasa lamah Cyclone Remal vangin Saitual District chuan chhiatna nasa tak a tawk tih a sawi a, kuminah pawh fur ruah sur avanga chhiatna hrang hrang thleng thei laka inralrin lawk a ṭul hle a ni, a ti. DDMA chairman chuan khuarel chhiatna a lo thlenin line department te chu kawlphetha, tui, kawng, buhfai, hriselna kaihhnawih leh thil dangah harsatna a awm loh nan mahni zawn ṭheuhah inpuahchah turin a chah a ni.

Vawiin thutkhawmah hian line department a bikin- PWD, PHE, P&E leh Health department hotute atangin fur ruah sur hmachhawn tura an ruahmanna te leh inpuahchahna te ngaihthlak a ni a. Line department hrang hrang hnuaia hamthatna dawngtute zingah khuarel chhiatna avanga harsatna tawk an awm a nih chuan enfiah tur niin, DDMA member te chuan enfiahtute tan TA/DA- ₹450 pek a, mahni lirthei kengte tan ₹24 per km pek an rel a ni.

Saitual District hi zone 3 a then niin, zonal officer pathum- Pi Dorothy Muansangi, SDO (C), Ngopa, Pu J. Lalhmahruaia, BDO, Phullen leh Pi Christina Lalnunfeli, SDC, Saitual ten an vil a. Village Disaster Management Committee din niin, training mumal tak pek an ni dawn bawk a ni.

Vawiin thutkhawmah hian DDMA Chairman & DC Dr. Lalngura Tlau, Co-chairperson & Project Director Pu V. Laldinsanga bakah DDMA member te leh line department hotute an tel a ni.