4717/2024-2025

Saitual, the 20th March, 2025: Vawiin chawhma dar 10:00 khan District Hub for Empowerment of Women (WCD) buatsaihin Saitual Chawnpui YMA Hall-ah International Women's Day 2025 lawmna hun hman a ni a, District Bawrhsap Dr. Lalngura Tlau chu khuallian niin hun a hmanpui.  

He hunah hian khuallian Dr. Lalngura Tlau chuan kalkhawmte chu hmeichhiate ni chibai a buk a, kumin atana thupui thlan "For all women and girls rights, equality, empowerment." tih chu a sawifiah. Khuallian chuan Mizo hmeichhiate chu zirna kawngah te, ei leh bar zawnna kawngah te leh sumdawnna kawngah te mipa te ai mahin hma an sawn zawk tih a sawi a, mahse hmeichhe chunga hleilenna hi a la tam hle a ni, a ti.  Hmeichhe baihvaite tluk luhna tur One Stop Centre chu Saitualah ngei pawh a awm tawh tih sawiin, khuallian chuan hmeichhe tanpui ngaite tan kalkhawmte chu ding zel turin a chah nghal a ni.  

Bawrhsap chuan mipa leh hmeichhia te chu rilruah leh pianphungah an inang thei lo tih a sawi a, an danglamna pawm chung zelin intluktlang tura hma lak a pawimawh a ni, a ti. Dr. Lalngura chuan mipa te pawhin an dam khawchhuahna tur thiam thil (life skills) chi hrang hrang ei rawng bawl te, insuk te leh inchhung chet te pawh an thiam ve a ngai tih a sawi a, thiam ngei tura chher turin nu leh pate an pawimawh a ni, a ti. Bawrhsap chuan kalkhawm hmeichhiate chu an dikna chanvo hria a, misualin hremna an hmuh theih nana report hreh lo tur leh kawng tin rengah a bikin politics leh kohhranah hma sawn tum zel turin a fuih nghal a ni. 

Vawiin International Women's Day lawmna hun hi Pi Mary Malsawmkimi, District Mission Coordinator (DHEW) in a kai hruai a, khuallian Dr. Lalngura Tlau chuan thu a sawi. Zirtirna pe tura ruat bik (Resource Person) Pi Lalrindiki, Professor, Aizawl Theological College hnen atangin "Hmeichhiate dinhmun bihchianna" tih thupui hmangin seminar neih a ni a. Pi Lalramhlui, Gender Specialist (DHEW) chuan POSH ACT 2013 chungchang chu powerpoint presentation hmangin a sawi zau a, Pu Samuel Lalremruata, Accoun Assistant (DHEW) chuan lawmthu sawinain hun a khar a ni.