653/2026-2027

Saitual, the 22nd May, 2026: Vawiin khan District Hub for Empowerment of Women (WCD) bul tumin, Addl. DC Office Chamber, Saitualah Pu Lallawmawma, Addl. DC hovin Saitual District-a nu chhuanawm (exceptional mothers) te hnenah chawimawina hlan a ni a, he hun hi nute ni 2026 puala buatsaih niin, Pi Mary Malsawmkimi, District Mission Coordinator, DHEW chuan a kai hruai.

He hunah hian Pu Lallawmawma, Addl. DC chuan thu a sawi a, nu chhuanawm tak tak te chawimawina hun an hmang thei chu lawmawm a tih thu sawiin, nu, naupang leh hmeichhiate tan kawng tam takah Sawrkar chuan hma a la zel a ni tih a sawi a, chutih rualin, hmeichhiate dinhmun chawikan nan theih tawp chhuah chhunzawm zel a tul a ni, a ti. Addl. DC chuan chawimawina hlan tak nu te chu a lawmpui thu a sawi a, malsawmna tam tak dawng turin a duhsakna a hlan bawk a ni.  

Pi Mary Malsawmkimi, DMC, DHEW pawhin thu sawiin he chawimawina hlan tur hian MHIP te nen thawhhona tha tak an neih thu a sawi a, chawimawi tlak hmeichhe tam tak awm mah se vawiinah pahnih chiah an thlan chhuah theih thu a sawi. DMC chuan  chawimawina dawngtute chu pa tel loa fate enkawl seilian an ni tih a sawi a, hmeichhiate ropuizia a lang chiang hle a ni tih a sawi bawk. Hmeithaite chhawmdawlna tur scheme hi Sawrkarah duan a la ni chiah lo tih sawiin, hmeichhe tana hamthatna scheme dang te chu kawhhmuh thei turin DHEW chu an inhawn reng thu a sawi bawk. 

Vawiina nu chhuanawm chawimawina dawngtute hi Pi Sangzuali leh Pi Lalrinsangi te an ni a, Pi Sangzuali hi a pasalin a thihsan hnuah a fate paruk enkawl sei lianin, a nu leh a unaupa rualbanlo a enkawl bawk a ni. Pi Lalrinsangi hi kum 2023 khan a pasalin a boral san a, a fate pali enkawl seilianin, a fapa naupang ber John Lalnghakliana chuan MPSC Combined Competitive Exam 2026-ah inziak tlingin MIS-ah a lut a ni.  

Vawiin inkhawm hi Pi Mary Malsawmkimi, District Mission Coordinator, DHEW chuan a kai hruai a, Pu Lallawmawma, Addl. DC leh kalkhawmte atang thusawi ngaihthlak a ni. He hunah hian DHEW office-a thawkte, MHIP Sub- Hqrs a hruaitute leh chawimawina dawng tawiawmtute an tel a ni.