742/2025-2026
Saitual, the 5th June, 2025: Vawiin khan Keifang Centenary Park, Saitual District-ah Mizoram Pollution Control Board leh School Education Department hmalaknain Plastic bawlhlawh tihfai runpui “Mass Plastic Clean-up Drive’ leh nu te hming chawia thing phun “Ek Ped Maa ke Naam 2.0” hawnna neih a ni a, District Bawrhsap Dr. Lalngura Tlau chu khuallian niin hun a hmanpui.
He hunah hian khuallian Dr. Lalngura Tlau chuan thu a sawi a, Saitual District chuan hman khat daih sarang (single use plastic) khapna kawngah hma a la mek zel tih sawiin, Mizoram Cleanliness Competition 2024-ah pawh District fai bera thlan a lo ni tawh a ni tih a sawi bawk. Bawrhsap chuan district fai ber ni tur leh plastic bawhhlawh tih tlem kawnga hma la a, theih tawp chhuah zel turin kalkhawmte chu a fuih a ni.
Dr. Lalngura Tlau chuan Ek Ped Maa ke Naam 2.0-in a thil tum chu mahni nute hriatreng nana thing phun a ni, a ti a, World Environment Day pual hian a hawnna hun hman niin he campaign hian September ni 30, 2025 thleng a awh dawn a ni, a ti. Bawrhsap chuan naupangte chu an nute hriatrengna tura thingphun an nih angin thinlung leh tih takzeta thing phun turin a chah a, a enkawl puitlin leh humhalh kawngah pawh zirlai naupangte leh zirtirtute chu theih tawp chhuah turin a chah a ni.
Vawiina Ek Ped Maa ke Naam 2.0 hawnna hi Pu R. Lalhmangaiha, Deputy DPC Samagra Shiksha, chuan a kai hruai a, khuallian District Bawrhsap Dr. Lalngura Tlau bakah hian Pu Hap Lalbiaktluanga, RO, EF&CC leh Pu Lalbiakhlua, FA, Mizoram Pollution Control Board te chuan thu an sawi. He campaign hi vawiin June ni 5, 2025 atanga intanin September ni 30, 2035 thleng a awh dawn a. School pakhatin thingkung 70 tal phun tura tih niin, October thla atangin a enkawl chhunzawmna hi tan tur a ni.
Vawiin hun hmannaah hian Govt. High School, Keifang, Govt. Middle School-I, Keifang, Govt. S.Tej Singh Middle School, Keifang leh Presbyterian English School, Keifang-a zirlai naupangte an tel a, kawng dunga plastic bawlhlawh te chu an chhar fai nghal a ni. Ek Ped Maa ke Naam 2.0 pualin zirlai naupangte hian an nu te nen theuh thing an phun dawn bawk a ni.
