4337/2024-2025

Saitual, the 19th February, 2025: Vawiin chawhma dar 11 khan DC Conference Room, Saitualah, District Bawrhsap, DLMC chairman ni bawk Dr. Lalngura Tlau kaihhruainain PMEGP hnuaia District Level Monitoring Committee (DLMC), Saitual district chu a vawi 1-na atan an thu khawm.

He hunah hian DLMC Chairman Dr. Lalngura Tlau chuan kalkhawmte hnenah lawmthu a sawi a, Prime Minister’s Employment Generation Programme (PMEGP) chu thalai eizawng mekte tana scheme tha tak a ni tih a sawi. Bawrhsap chuan thalaite chu sawrkar hnain a daih vek loh avangin eizawnna kawng hrang hrang an hawi tel a ngai tih a sawi a, PMEGP chu kawng kawmhmuhtu leh hma latu pawimawh tak a ni, a ti. PMEGP chu Saitual Town Area mai bakah Saitual District-a khaw hrang hrang te a tuam kim theih nan kalkhawmte chu theih tawp chhuah turin leh awareness te pawh a theih ang anga kalpui turin Bawrsap chuan a chah nghal a ni.

Pu V. Laldinsanga, Member Convener & DCIO, Saitual district hnen atangin report tawi ngaihthlak a ni a. DCIO chuan Saitual district-in target te an phak ngei theih nan vawiin thutkhawm hi a bul tanna hmasa a ni a ti a, awareness programme te pawh neih zui a nih tur thu a sawi bawk. Pu Robert Zosangliana , Lead District Manager, Lead Bank Office, Saitual pawhin report pein, PMEGP hnuaia dilna rawn thehlut tute chu uluk leh zuala lo endik turin leh loan rul tha lo tura rin te chu hnawl ngam turin bank manager te a fuih a ni.

Pi Zodinpuii, Asst. Director, KVIC, Aizawl chuan Saitual District-a financial year 2024-2025 chhunga bank wise leh agency wise performance report a pe a, Bank manager te atang loan/margin money pek chhuah a nih dan report ngaihthlak a ni bawk.

He thutkhawm hi DLMC Chairman Dr. Lalngura Tlau chuan a kaihruai a, Pi Zodinpuii, Asst. Director, KVIC, Pu V. Laldinsanga, Member Convener & DCIO, Saitual, Pu Robert Zosangliana, Lead District Manager, Saitual, Pi Helen Zomuanthangi, ARDO, DRDO, Pi F. Zodingpuii, DIPRO, Pu R. Lalruatkima, President, Sub Hqrs YMA, DLMC member te leh Saitual District-a bank hrang hranga manager te an tel a ni.