4336/2024-2025

Dated Serchhip, the 19^th February, 2025: Vawiin khan Serchhip District Skill Committee chu an Chairman Serchhip DC Pu Paul L Khuma hoin DC Meeting Hall ah an thukhawm.

Vawiin meeting-ah hian Serchhip District Skill Development Plan 2024-2025 ruahmanna an thlir ho a. Serchhip District chu India rama ziak leh chhiar thiam percentage sanna ber ni mahse eizawnna hlawk leh ngel nghet neih kawngah hmasawnna tur an la ngah hle a, chuvangin, Serchhip District chhunga Department hrang hrang kalkhawm te chuan an Department kaltlanga sawrkar laipuiin mipui tana scheme a kalpui mek te tangkai leh zuala hman dan an enho a ni.

Member te hian scheme an kalpui dan leh an dinhmun an report a. Pradhan Mantri Kaushal Vikas Yojana (PMKVY), Deen Dayal Upadhyaya Grameen Kaushalya Yojana (DDU-GKY) leh Deen Dayal Antyodaya Yojana – National Urban Livelihood Mission (DAY-NULM) scheme hmanga Serchhip District chhung khaw hrang hranga thalai te, lehkhathiam hna nei lo te leh hmeichhiaten eizawnna tha zawk an neih theihna tura hma an lak dan leh hma an lak tawhna report te ngaihthlak a ni.

Heng scheme hrang hrangte mai bakah sawrkar laipui atanga mipuite tana hmasawnna sum lo kal khawihtu department te thawk hoin Serchhip District tan District Skill Development Plan 2024-2025 hi duan a ni a. Additional DC Pu Lalrinzuala kaihhruaina hnuaiah Sub-Committee siam a ni a. Plan buatsaih tawh hi chipchiar taka thlir ho leh sawiho a nih hnuah siam rem ngai te siam rema, belh ngai te belh leh ni se tiin meeting chuan a rel a ni.

Vawiin meeting ah hian Health, Social Welfare, Agriculture, Horticulture, AH&Vety, Fisheries, DRDO, UD&PA, LAD, Commerce & Industries, Co-operation,  Lead Bank, DIET, Vocational Training Institute, Joint VC leh Sub-Headquarters YMA te an tel a ni.