540/2025-2026

Saitual, the 23rd May, 2025: Vawiin chawhma khan Mizoram State Legal Service Authority leh All Mizoram Women Elected Representative te tangkawp chuan DC Conference Hall, Saitualah NALSA hnuaia scheme zirchianna leh Saitual District-a hmeichhe thlan tlin te tana training- “ Special Campaign on Schemes of NALSA and Capacity building & Leadership training for elected women representatives” an buatsaih a, a hawnna inkhawmah hian District Bawrhsap Dr. Lalngura Tlau chu khuallian niin hun a hmanpui.

He hunah hian khuallian Dr. Lalngura Tlau chuan thu sawiin, VC thlan tharte tan Sawrkar flagship scheme hrang hrang inzirtirna leh disaster management training te chu buatsaih a lo ni tawh tih a sawi a, vawiina Mizoram State Legal Service Authority leh All Mizoram Women Elected Representative te tangkawpin dan chungchanga inzirtirna leh inhrilhhriatna hun tha tak an nei leh thei tur chu a vanneihthlak hle tih a sawi.

Bawrhsap chuan hmeichhiate dinhmun chawikan nan hma lak mek zel a ni tih a sawi a, Mizo hmeichhiate chu an tawrchhelnate, an teirei peihnate leh an taimakte avangin kawng hrang hrangah mipa aiin hma an sawn a ni, a ti. Dr. Lalngura Tlau chuan Mizo hmeichhiate chuan hma sawn viau mahse politics lamah tan lak a la ngai hle a ni, a ti a, politics ngaihven a, ruat sa seat awm lohnaah pawh ding ngam turin leh ram tana theih tawp chhuah zel turin VC thlan thar hmeichhiate chu a fuih a, training hlawkthlak tak nei turin duhsakna a hlan nghal a ni.

Vawiina training hawnna inkhawm hi Pi R. Zomuanpuii, President, All Mizoram Elected Women Representatives chuan kaihruaiin kal khawmte lawmna thu a sawi nghal a. Chawhnu lamah hian thupui thlan chhuah pathum hmanga zirhona neih zui niin, “Various Schemes of Legal Services Institution with special focus on women” tih thupui hmangin Pi Lalfamkimi, Advocate chuan zirtirna a pe a ni.

Pi Rebecca Hmingsangzuali, Inspector, Saitual chuan “Dan leh thupek kenkawhnaa kan hriattur pawimawh” tih thupui hmangin zirtirna pein, Pu David Lalthanmawia, Sr. Faculty, SPRC chuan “Khawtlang rorelnaa thlan tlin hmeichhiate mawhphurhna” tih thupui hmangin zirtirna a pe bawk a ni. He hunah hian kalkhawmte chuan zawhna leh chhanna hun hlawkthlak tak an hmang nghal a ni.