4602/2024-2025
Saitual, the 11th March, 2025: Vawiin chawhma dar 10:00 am khan DC Conference Hall, Saitualah Election Officer Pu Lalthakima Chhangte kaihhruainain Village Council member thlan thar te tan orientation training buatsaih a ni a, sawrkar department hotute atangin sawrkar laipui scheme pawimawh tak tak inzirtirna hun hman a ni bawk.
He hunah hian District Election Officer, District Bawrhsap ni bawk Dr. Lalngura Tlau chuan VC member thlan tharte chu lawmpuina chibai a buk a, training chu hlawkpui ngei turin duhsakna a hlan nghal a. Bawrhsap chuan VC member te chu kum nga chhung mawhphurhna chelh tur an nih avangin harsatna leh sawiselna karah pawh chhel taka awm a, hna tha taka thawk turin a fuih nghal a ni.
Dr. Lalngura Tlau chuan Saitual district-a administration khaidiat te sawifiahin, sawrkar leh khawtlang kalphung te chu VC member te chuan an hriatfiah a pawimawh a ni, a ti. DEO chuan department hotute’n an ngaihtuahna sengin district-in hma a lo sawn zel theih nan training hi buatsaih a ni, a ti a, he training hi hlawk taka chhawr a, zawhna nei te tan inthlahrung loa zawt turin kalkhawmte chu a chah a. VC member te chu khawtlang mipuite leh sawrkar department te nen inpuitawn a, thawhhona tha tak nei turin a sawm a nghal a ni.
Vawiinah hian thupui hrang hrang- Land Compensation, Land Revenue, DC Admin., DM&R, Certificates, Agriculture Scheme, Overview of MGNREG, PMAY-G & PMKSY 2.0, Solar chungchang, FCS&CA hnuaia Gov’t Scheme hrang hrang, Delay Birth & Death chungchang, Saitual District chhunga Sericulture Department hmalakna, Samagra Shiksha Abhiyan (SSA), 15th Finance, UD&PA hnuaia Scheme hrang hrang, Water Supply & Sanitation, MIDH Scheme, RKVY-PDMC, NABARD Scheme, PMMSY, AH & VETY Department hmalakna tlangpui, Mission Shakti hnuaia Sub-scheme chungchang te chu power point presentation hmangin line department hotuten zirtirna an pe a ni.
Vawiin orientation training hi Pu Lalthakima Chhangte, EO- in a kai hruai a, Dr. Lalngura Tlau, DEO -in thu sawiin, department ho tuten zirtirna an pe bawk a ni. He hunah hian Saitual District-a Village Council President, Vice President leh Secretary te leh member dang te an tel a, Pi Christina Lalnunfeli, SDC chuan lawmthu sawinain hun a khar a ni.
