3407/2024-2025

Saitual, the 6th December, 2024: Vawiin chawhnu dar 1:00 pm khan Sub-Hqrs, YMA Hall Saitualah World AIDS Day puala hun hman niin, kumin thupui atan “Take the right path” thlan a ni a, he hunah hian District Bawrhsap Dr. Lalngura Tlau chu khuallian niin a hmanpui.

Khuallian Dr. Lalngura Tlau chuan kalkhawmte hnenah lawmthu a sawi a, HIV AIDS chungchang inzirtirna IEC (Information, Education & Communication) lamah tan kan la nasa chu lawmawm a tih rualin Mizorama HIV AIDS kai zatin san lam a pan zel chu pawi a tih thu a sawi. Bawrhsap chuan HIV AIDS hlauhna chu mipuiteah a hma ngaihtuahin a tlahniam tawh hle a ni, a ti a, he natna hrik hi mipui nawlpuiah a darh tawh avangin tihrem a harsat phah hle tih a sawi bawk.  HIV AIDS laka invenna leh inzirtirna beihpui thlak tur hian tha thlah loh a tul tih sawiin, kohhran leh khawtlang hruaitute chu hemi kawnga hma la zel tura a duh thu Bawrhsap chuan a sawi a, kalkhawmte chu he natna hrik laka kan inven theih nan theih tawp chhuah a, midangte hrilh hriatna kawnga hma la zel turin a chah nghal bawk a ni.   

Vawiin hun hmannaah hian zirtirna pe tura mithiam bik (Resource person) atan Pu Emmanuel Lalthazuala, Advocate chu ruat a ni a, The HIV and AIDS (Prevention and Control) Act, 2017 chungchang chu powerpoint presentation hmangin a sawifiah a, HIV AIDS veite’n dikna chanvo leh mawhphurhna an neihte a tarlang a ni.  

He World AIDS Day programme hi Dr. V Lalremruata, Dy. CMO chuan kai hruaiin, District Bawrhsap Dr. Lalngura Tlau leh Pi Zuiliani Hrahsel, Jt. Director IEC, MSACS te chuan thu an sawi a. Dr. Tlansangzela, MO, ART chuan lawmthu sawiin hun a khar a, damdawi ina thawkte, line department hotute, khawtlang leh kohhran hruaitute chu he hun hmang tur hian an tel a ni.