Vawiin khan Irrigation & Water Resources Department hnauia Technical staff, Service Association of Minor Irrigation Technical Staff (SAMMITS) te chuan ATI Auditorium, Khatla-ah General Conference an hmang a; Irrigation & Water Resources Minister Pu C.Lalrinsanga chu Khuallian niin Pu H.Lalengmawia, Secretary, Irrigation & Water Resources chu Khualzahawm a ni.

General Conference hawnna inkhawm hi Er.Beizawzi, SE (Works & Design)-in a kaihruai a, Association chanchin leh hmalakna hrang hrang ngaihthlak niin Chief Engineer Pu Lalrotluanga’n Department hmalakna hrang hrang - National Hydrology, National Water Policy leh Ground Water kaihhnawia hmalaknate a tarlang.

Khuallian Irrigation & Water Resources Minister Pu C.Lalrinsanga chuan Department indanna tura hma an lo lak tawh dante, hnathawh reng reng a tha thei ang bera thawh a, hna viltu leh thawktute pawhin chu chu an rilruah riak reng se a duh thu a sawi a. Dik tawk lo leh hna a nih tur ang ni pha lo chu chhui a, hailan zel a nih tur thu a sawi a, chumi ti tura nawrtu lian ber chu kan thawh chhan ber mipuite an nih, a ti. Minister chuan an Department chu Agriculture leh a kaihhnawih department dangte nena hna thawhho thiam a tul thu a sawi bawk.

Pu H.Lalengmawia, Secretary pawhin thusawiin sorkar hnathawkte chu an nihna zawna an mawhphurhna theuh an hriatchian a ngai a, sorkar policy leh ruahmannate hlawhtlin leh hlawhtlin loh chu sorkar chelhtu political party mai ni lovin, a field-a thawk tak tak sorkar hnathawkte an ni a ti. Sorkar hnathawkte chu anmahni dawrtu mipuite chungah that chhuah fo tur leh mahni nihna zawnah huaisen tak leh inring tawk taka awm a, hotute thu zawm fo turin a chah bawk.