No.4976/2020-2021

Dated Champhai, the 11th September,2020: Vawiin khan Champhai District chhung khaw pahnih Samthang leh Farkawnah te Pi Fangi Tourism Development Agency (PF-TDA) leh North Eastern Council (NEC) tangkawp buatsaihin khualzinte hipna tur Ecotourism chawilar kawnga inzirtirna leh District Disaster Management Authority hmalaknaa chhiatrupna thlen thulha chetlak leh tihtur tulte inzirtirna hun hman a ni. He hun hi Pi Maria C.T Zuali, Champhai District Bawrhsap chuan Khuallian niin a hmanpui. Champhai District Bawrhsap hian vawiin chawhnu khan Indo-Myanmar ramri dep khua Saikhumphai tlawhin African Swine Fever ven kawnga hmalaknate a enfiah nghal bawk.

Pi Maria C.T Zuali chuan Champhai District chhunga Pi Fangi Tourism Development Agency (PF-TDA) leh North Eastern Council (NEC) te'n hmalakna tura an thlanahte Ecotourism leh Disaster chungchang inzirtirna neih ani thei chu lawmawm a tih thu a sawi a. Hun lo kal zel turah pawh Sawrkar ruahmannate tihlawhtlinga hmasawnna kawng zawh turin tanlak zel tum ani, a ti a. Mipuite chu hunawl hmang thaa taima taka intodelh tuma hna thawk turin a fuiha, faina ngaipawimawh fo tura chahin Training hun hlimawm leh hlawkpuiawm tak nei turin duhsakna a hlan a ni.

He hunah hian Pi Vanramchhuangi (Ruatfela Nu) Chairman, Pi Fangi Tourism Development Agency (PF-TDA) leh Pi K.Lalmuanpuii, Lenbuang Handloom & Handicrafts te hnen atangin Ecotourism chawilarna kawnga inzirtirna hrang hrangte ngaihthlak a ni a. Chhiatrupna thlen thulha chetlak dan tur leh Village Level Disaster Committee (VDMC) te mawhphurhna chungchang Pu P.C Zoramthara, District Disaster Management Coordinator in a zirtir bawk.

Training-ah hian Champhai District chu Ecotourism lama theihna sang tak nei anih thu leh eizawnna kawnga innghahna tham anih thu tarlan ani a. District chhung khua Village Level Disaster Committee (VDMC) din lohnaah te pawh VDMC mumal leh nung tak din vek tuma hmalak mek zel anih thu tarlan a ni bawk. Relief Camp siamte lirnghing mai bakah khuarel chhiatna thlen thulha sahimna tura siam anih thu leh tui chhe paihna leh tuiluankawr mumal tak siam a tul thute inzirtir a ni bawk.

Pi Fangi Tourism Development Agency (PF-TDA) leh NEC tangkawp hmalaknain Mizorama khaw 5; N.Vanlaiphai, Farkawn, Khawbung, Samthang, Kelkang leh Tlangnuam/Chhuantharahte Tourism chawilarna kawnga hmalak tum a ni a. Heng khuate hi pipu sulhnu, rinna leh sakhuana lam avangte, ramngaw leh nungcha awm that avangte a thlan an ni a. Heng khuaahte hian Khualzinte hipa, khualzinte hnen atanga sum leh pai lakluh mai bakah tunlai khawvel nunphung leh ningkhawng hriat mai bakah Tourism tihhmasawn kawngah thui taka hmalak tum a ni.

Pi Maria C.T Zuali chuan vawiin chawhnu khan India leh Myanmar ramri Saikhumphai chu tlawhin tunhnai Vawk hri hlauhawm tak thenawm State leh ram thenawma leng mek African Swine Fever (ASF) ven kawnga hmalaknate a enfiah a. Thupek bawhzuiin Indo-Myanmar ramri kana ran intlatpawlhtir a awm tawhlo tih finfiah a ni.

Vawk natna hri hlauhawm tak African Swine Fever laka Champhai District a him theihna turin thenawm ram/ state dang atanga Vawk vawksa leh vawksa atanga siam reng rengte Champhai Districta phurh luh leh phurh chhuah mai bakah khawi khua atang maha phurh chhuah leh phurh luh khap tlat a lo ni tawh a ni.

Ecotourism & Disaster Management training leh Saikhumphai tlawhnaah hian Champhai DC hi Dr. Lallawmkima DIPRO leh Pu Benjamin Zalawma Ralte BDO Khawbung ten an tawiawm a ni. Training-ah hian Samthang leh Farkawn khuaa VC, NGO aiawh, Zirtirtu leh Village Level Disaster Committee member-te tel a ni.