Vawiin hian Fisheries Department Serchhip District chuan Sangha tui tir dan tur chungchangah Sangha khawitute nena inkawm hona hun an buatsaih.
Pi Zonuntluangi, District Fisheries Development Officer chuan kum tin Common Carp tui hun chho ah hetiang hun hi an buatsaih thin a, tun hi tum thum an buatsaihna a nih thu sawiin, zawngchhang tlak tak nia a hriat thu a sawi a. Hetiang zirtirna lo dawng tawhtute hlawhtlinna hi nikum chhung khan cheng Nuai 12 vel hian a tlin thu a sawi a ni.
He hun buatsaih tur hian a hranpa in sawrkarin pawisa a dah lova, chumi hre chung chuan sum leh pai beisei hauh lova Sangha enkawl dan tur zir duh Sangha khawitu, rilru leh ngaihtuahna hrisel leh changkang tak tak, hmun hla tak tak atanga lo kal an awm chu lawmawm a tih thu a sawi bawk.
Pu Lalropara Khiangte, Asst. Fishery Officer chuan Breeding of Common Carp chungchangah zirtirna a pe a. Nasa lehzuala sangha chi thar chhuakin, intodelh thei ngei tura hma la turin sangha khawitu kalkhawmte a sawm a ni.
He hunah hian district chhunga khaw hrang hrang atangin sangha khawitu mi 60 vel an kalkhawm a, hlawkthlak an ti hle a ni.
