Tukin zing khan Range Officer Sairang Forest Range, Pu Rongura Hrahsel Quarters-ah, Association for Environment Preservation (ASEP) leh Sairang YMA Branch pangate tangkawp chuan Bairabi atanga Sairang rail kawng (New B. G. Railway Line)  sial avanga sava leh ramsa tenau chenna tihchhiat sakte tana mihring siam chawp chenna In tlangzarhna hun Release of Alternative Habitat/ Home for Avifauna an hmang. He inhmuhmuhkhawmah hian ASEP leh YMA member-te chuan ramsa tenau chenna, sava bu leh thing thanhnem tak Railways ten an tih chhiat thlak nana chenna In siam hna chu hnatlangin an thawk a ni.

Range Officer Pu Rongura Hrahsel chuan an kalkhawm chhan sawiin, Ministry of Environment & Forest, Government of India thupek anga ramsa tenau chenna thar tur sakna senso hi Railways tum a nih thu a tarlang a. Mizoramah hmasaawnna hrang hrang avangin ramngaw kan ti chereu chak lutuk a, chhevel boruak, thing leh mau, ramsa leh nungchate hi mihringin dam khawchhuah nana kan mamawh avangin hmasawnna hna thawk reng chunga nungchate humhalh hi kan tih makmawh a ni, a ti bawk. Nungchate chenna tur bute chu science thiamna hmanga zirchian an nih hnuah tualchher hmanraw hmanga siam an nih thu a sawi tel bawk.

ASEP aiawhin an President Pu K. Lalmuansanga’n he inhmuhkhawmnaa ngaihpawimawh an ni chu lawmawm a tih thu leh pawl anga an lo kal tawh dan  chanchin tawi a sawi a. Kalkhawmte hnenah hun tlemte senga heng ramsa tenau leh savate chenna in chu kan bungraw duhloh hmanga awlsam tea siam theih mai a nih thu a sawi bawk. 

Hnatlanga thawkchhuakte hi pawl ngaah inthenin Sihhmiu atanga Pualhrang thleng an feh chhuak a. Ramsa tenau leh sava bute hi Wooden Plank cabinet, mau, plastic pangpar khawina pot, artificial leh hollow cavity (thing khawro) atanga siamte an ni.