Chief Minister Pu Lal Thanhawla chuan chungleng savate humhalh an nih theihna turin thalaiten ‘Bird Club’ din nachang hria se a tha hle ang a ti. He thu hi vawiina Lal Thanawla Auditoriumah Mizorama savate chanchin ziahna lehkhabu ‘Popular Birds of Mizoram’ tih Dr.H.Lalthanzara leh Dr. Raju Kasambe te ziah a tlangzarhnaa a sawi a ni.

Chief Minister chuan lehkhabu kan la neih ngai loh, lehkhabu tha tak leh tangkai tak tur buatsaih a ni chu a lawmawm tak zet a ni a ti a. Lehkhabu ziah hi awlailo tak, taimakna leh hriatzauna neih ngai a ni a, hetianga zirchianna ang lehkhabu ziah phei chu namailo tak a ni a ti a. He lehkhabu hian tourism industry dinna kawngah thleng tangkaina a nei thei a ni a ti.

Chief Minister chuan Mizoram hi nungcha leh thing leh mau tamna hmun, biodiversity hotspot ani a, mahse Mizote hi Pathian thil siam chungah ngilneihna kan tlachham hle a ni a tiin, silai kan hmang theilo anih pawhin tur tal hmangin kan la hrai duh zel a, a nunrawn thlak hle ani a ti. Tunah hian sorkar ang leh kohhran leh tlawmngai pawl te tang tlangin kan thangharh chho mek a, a lawmawm hle a ni a ti. Sorkar programme NLUP te hi hman dik phawt chuan nungchate, thing leh mau kan tih chereu mekte leh tuihna kangchat mekte hi kan nei let leh thei dawn a ni a ti.

Mizoram sava chi hrang hrang a lem nen ngeia hmuh theiha chhawpchhuah a ni hi miupuite thinlungah nasa taka hna a thawh ngei a beiseiawm a ni Pu Hawla chuan a ti a. Sava te chenna humhalh hi kan tum tlat tur a ni tiin, thlalak lama tuimiten sava hlu tak tak thla an la thin hian silaia sava veh ai chuan camera nena veh a ropui zawk tih min zirtir thar tu ni ngei se a lawmawm ngawt ang a ti. Chief Minister chuan kan khawpui pawh ‘smart city’ a siam kan tum mek lai hian, camera emaw entlang emaw a sava te kan zirchian hi a hun hle a ni a ti a. Lehkhabuah sava chi hrang hrang 208 zet pholan a ni chu thlalatute tan chona tha tak a ni a ti.

Lehkhabu hi Pu Lalram Thanga, Principal Secretary & PCCF in thlirlawkna neiin, kum 2 dawn buaipui anih thu a sawi a. India ramah Mizoram hi sava te chenna hmun pawimawhte zingah chhinchhiah anih thu a sawi a. Lehkhabu ah hian sava family 53 zingah 208 pholan a ni a ti a. Mizoram sava te hi zirchianna la neih ngai loh anih thu a sawi bawk.

Lehkhabu hi saptawnga ziah anih thu leh sava hmingte erawh Mizo hminga dah tel an ni a ti. Aman hi Rs.300/- anih thu a sawilang bawk. Lehkhabu tlangzarh inkhawm hi Dr.Tawnenga, Principal, Pachhunga University College in a kaihruai a ni.

Attachment

  • Loading attachment...