Vawiin khan Chief Secretary Conference Hall-ah Finance Department Principal Secretary Pu Lalnunmawia Chuaungo IAS hovin Chite Lui humhalh tura hmalakna Save Chite Lui Executive Committee an thukhawm.

Pu Lalnunmawia Chuaungo chuan Chite Lui chhanchhuahna tur atan hian hmalakna hrang hrang, awmze nei tak tak kalpui mek a ni tiin tunhma aiin mipuite bawlhhlawh paih chungchangah kan fing chho zel a, kan ram lui leh tuihnate pawimawhna kan hrechiang telh telh a ni, a ti a. Save Chite Lui Executive Committee hi vawi tam tak thukhawm tawhin vawiin meeting-ah hian ‘Save Chite Lui’ project kalpuina atana hmalakna hrang hrang thlirletna hun hman a ni a. Kawng siam nana bawlhhlawh (plastic) hman dan tur rel a ni bawk.  Chite Luia bawlhhlawh paih 85%-90% hi plastic a ni a, plastic khawn khawm dan tur te, kawng siamna nena pawlh dan tur te leh khawl mamawh te sawiho a ni. India rama state dang Tamil Nadu, Karnataka, Meghalaya-ah te hlawtling takin hman a lo ni tawh a ni.

Nikum June thla atang khan Save Chite Lui Comprehensive Action Plan Phase-I kalpui niin mipui hnena lui leh tuihna humhalh chungchanga inhrilhhriatna seminar, hnatlang, nature trekking, documentary hmang ten neih a lo ni tawh a. Aizawl DC pawhin Chite Luia leivung paih khapna tichhuak tawhin The Chite Lui (Prevention and Control of Water Pollution) Act, 2018 pawm a ni tawh a. Save Chite Lui Comprehensive Action Plan Phase-II hnuaiah hian hmalakna hrang hrang awmin chung zinga pakhat chu kawngpui siam nana bawlhhlawh (plastic) hman niin ram leilung tichhe lo zawnga hman a nih theih nana hmalakna a ni a. Indian Road Congress Report leh Plastic Waste Management Rules, 2016 chuan plastic waste kawngpui siam nana hman tur tih an lo tarlang tawh a ni.

Save Chite Lui Coordination Committee memberte, Environment, Forest & Climate Change Department, UD&PA Department, PWD, I&PR Department te an tel a ni.