Ruahman lawk anga Vankal khua a Vankal Solar Park vawiina P&E Minister in a hmun ngeia lung phum a tum chu nizan lam ruahsur nasa avangin lei min a awm a, kal theih a nih loh avangin Kawlkulh Highway Restaurant, Kawlkulh-ah lungphum phumna programme hi neih a ni.
‘Lalpa remruat dan’ chu kan tana tha tur zel a ni, vawiin a remchang taka Kawlkulh a Vankal Solar Park hawnna programme hman te pawh hi thil tawn ngai loh, mahse tha tak si leh remchang tak, hriat fo chi a nih thu P&E Minister, Pu R Lalzirliana chuan sawiin, Vankal khuaah chuan tun hunah kal thei lo mah ila remchang hmasa berah kal ngei a tum thu a sawi a, khaw lar leh danglam, fal deuh raiha awm, chanchin pawh ngah tak anih avangin a hmun ngei a kal a, khaw mipuite hmel hmuh a, chibai ngei a tum thu a sawi a. Programme ruahman lawk anga hun hman theih ni lo mahse, vawiinah hian thil tam tak a hmuchhuak ani tiin Khuallian Pu R.Lalzirliana chuan Vankal Solar Park tawngtaia Pathian hnena tha taka a hlan thu a sawi.
Khualzahawm Pu H. Rohluna Education Minister chuan ama bial ngei ah 20MWp Vankal Solar Park hawn a ni chu amah leh a bial te tan thil lawmawm leh chhinchhiah tlak tak a ni a ti a. Vankal mai bakah a bial hmun dang ah te sorkar leh P&E Department tan hmasawnna rahbi an tuk chhoh zel naah lawm thu a sawi.
Programme hi Pu H.Lalengmawia IAS P&E Secretary in kaihruaiin, he park hawn Programme ah hian Pu T.T.Zothansanga MLA chuan he lam bial sorkar in a ngaihsak chu lawmawm a tih thu leh ralkhat atanga thlir fo thin kal chakawm tak Vankal in P&E Department hmalak na atanga Solar Park hawn a lo ni chu lawmawm a tih thu leh hmasawn na hriat reng tlak a ni a ti.
Lawmthu sawitu Pu Laldela, S.E, P&E Aizawl chuan Vankal khua ten Solar Park siam nana hna thawhna kawng hrang hrangah phur taka an tawiawm leh a puih thin naah lawmthu a sawi a. A hmun ngei a an kal chilh thei lo erawh chu mihring te thu a nih loh avang in hrethiam turin a ngen nghal a, Technical report hi Pu C.Lianlunga, S.E, P&E in a pe bawk ni.
Vankal Solar Park siamna tur A/A amount chu cheng nuai 2,107 a ni a, sawrkar laipui leh state sawrkar intum sem tura ruahman a ni. Kum 2019-2020 chhunga zawh hman beisei a ni a. A ram hi 140 acre vela zau niin Solar Park atanga power siam chhuah chu 2x12.5 MVA, 132/33kV Substation hmanga lak chhuah tur a ni ang. He hmun atanga hnai ber 132kV Saitual - Khawzawl line-ah power hi chhun luh tur a ni. Kawlkulh atanga kawng awm sa 8.4kms hi zauh leh cheithat hna thawh mek a ni a, Solar Park hmunah hian tui sem darhna tur atan water tank 36.0kilolitre a lian siam a ni bawk. He project hi kum 25 daih tura duan niin, kum tin 32.120GWh eng chakna a pe chhuak thei dawn a ni.
