Mizoram thlai thar hralh chhuah kawnga hmala tura Mizoram Cooperative Apex Bank in Firm a din Mizoram Agriculture Marketing Solution (MAMSoL)  chuan Bairabi a MAMSoL Mini Trade Center atangin vawiin khan sawhthing hralh chhuah an tan a,  Kolasib DC Pu H. Lalengmawia chuan he sawhthing hralhte hi a vai liam a ni.

Pu H.Lalengmawia chuanMAMSol in kuthnathawktute hma ngaia hetianga hma an la chu lawmawm a tih thu sawiin, sawhthing thartuten hralhna mumal tak an neih theihna tur a nih a rin thu a sawi a. Sawhthing chingtute  pawh a leitu ten leitur hnianghnar taka an neih reng theih nan a tharchhuah lama tan la zual turin a chah a. A hralhchhuahna tur ngaihtuahtu pawl an awm hi kuthnathawktuten kan hman tangkai a kan thlawp that angai a ni a ti.

He Flag off na inkhawm hi MAMSoL chairman Pi T. Lalmuanpuii chuan  kaihruaiin, MAMSol chu Mizorama kuthnathawktuten an thlai thar hrang hrangte man bithliah tha tak neia an hralh theihna atana din,  sum lama hlawkna aia kuthnathawktute tanpui theia awm chu a din chhan ber a nih thu a sawi a. Mizoram loneitute sawhthing thar lei khawl sak a,  Mizoram pawn atanga thlai thar lei turte Mizorama ko lut a lei tir chu an tum a nih thu a sawi a. Tun dinhmunah India ram puma sawhthing rate athat tawk loh avanga man sang taka sawhthing an lei theih loh thu leh a man hian san lam a pan chhoh beisei a nih thu a sawi.

Vawiin ah hian Sawhthing 180 qt State pawn ah an hralhchhuak nghal a. Heng sawhthing te hi Collection center ah 1kg Rs. 8 in an lei a,  Bairabi ah Rs. 10 a lei a ni.
MAMSol hian tun dinhmunah sawhthing lakkhawmna hmun Mizoramah 29 an nei a ni.

MAMSol sawhthing flag off programme hi Kolasib District chhunga sawrkar official leh tlawmngai pawl leh zirlai pawl hruaituten an hman pui a ni.