Tukin khan Commerce and Industries Minister Dr. R. Lalthangliana chuan Aizawl Bazarpuia building hlui leh lianber, sak that tur a tlawh a. Hei hi nimin lama sawrkarin New Market Building hluia Sumdawngte, an awmna building a him tawh loh avang leh sak that a ngaih avanga chhuak tura a tih bawhzuina a ni.

Sawrkar Team leh Bazar Sumdawng  Pawl Hruaitute chu Commerce & Industries Site Office-ah an inkawm hmasa a. Inpawhtlang takin thil awmzia te sawiho a ni a. He hunah hian Commerce & Industries Minister Dr. R.Lalthangliana chuan sawrkar chuan ngun taka thil a ngaihtuah hmasak thu te leh tuna sawrkar thuchhuah te pawh kan zavaia himna tur leh a kawng awmchhun nia hriat a nih thu te a sawi hmasa a. Chhungkaw sangtel teh  meuh sumdawnna a khaihlak hret tur chu thil hriat hreawm tak a nih rualin chhiatna lian zawk, nunna tam tak hloh theihna kan pumpelhna tur kawng a ni tih hrethiam turin Sumdawngte Pawl hrang hrang hruaitute chu a ngen a ni.

Bazar sumdawngte lam atangin an hruaitute rawn ding chhuakin an harsatna te, Bazar chhunga an eizawnnate chu chhungkaw innghahna ber a nih thu te leh sawrkarin Building thar a sak hunah Seat an chan tawh loh mai te an hlauthawng bawk tih an sawi a. An harsatna te hriatthiam pui turin sawrkar an ngen a. Bazar sumdawngten an harsatna an sawite hi ngun taka ngaihthlak niin Dr. R.Lalthangliana chuan a tha zawk, a him zawk leh tu leh fate atana rotling siam a tul thu te ngaihtuah na nen hmalak thuai tum a ni tih a sawi a. Seat chanloh  chu thil hlauhthawn awm a ni loh thu sawiin,  “Bazar building hluia seat nei zingah anmahni duhthua an sumdawnna tihtawp duh te an awm a nih ngawt loh chuan tuna seat nei te hian an neih leh ngei sawrkarin a duhsak a ni”, a ti. Bazar building hlui chu thiaha sak that ngawr ngawr sawrkarin a ngai pawimawh ni lovin Bazar chhunga nitina thu, sumdawngte bakah anmahni himna tur ngaihtuahna avang zawk a ni tih a sawi a. Tuna Bazar building hluia awm zawng zawngte chu Building thar sak zawh a nih hma chuan hmunkhatah dahkhawm vek theihna tur hmun a awm lo tih sawiin AMC lam nen tangho in a remchang anga seat pek vek  an ni dawn a. Tuna thil pawimawh hmasa ni ta chu chhiatrupna a thlen thulh lohnan building hlui thiah thuaia building thar sak hna tan hi a ni a ti.

Sawrkar Team leh Bazar Sumdawng pawl hrang hrang hruaitute inkawmnah hian Commerce & Industries Director Pu J. Hmingthanmawia leh PWD Buildings Chief Engineer Pu Bowman ten report tawi an pe a. Report-a tarlan dan chuan Bazar building lian ber hi  kum 1987 khan Roorke College of Engineering ten Drawing leh Design an siam anga sak a ni a.  A building hmanrua cement leh balu te hi a tha chi hman ni se tunah pawh la hlauhawm lo tura ngaih a ni a. Mahse tun dunhmunah chuan building chhuat pawp lian tak tak hmun thenkhatah awm tawhin a ban leh a beam tuamna concrete mix te hmun tamtak a tla filh deuh vek tawh a, a rod te pawh a tuam tawh miahlohna te pawh a awm tawh a ni. Kum 2015 June ni 8 khan Aizawl District Disaster Management Authority(ADDMA) Team chuan zirchianna an neih behchhanin he building hi Building him lo, luahtlak tawh loah a puang a. ADDMA Report tlawhchhan hian  vawi hnih; kum 2015 leh 2017-ah te khan Bazar building hluia sumdawngte chu chhuak tura lehkha(Eviction Notice) pek an lo ni tawh a ni. Nimin khan sawrkar chuan a vawi 3-na ni turin Eviction Notice( Chhuak tura tihna thupek) chu Mizo Tawnga siamin Bazar sumdawngte hi a pe leh tawh a. Eviction Notice-a inziak ang chuan June 21, 2019 atanga chhiara ni thla khat ral hma ngeia chhuak turin helai hmuna sumdawngte hi hriattir an ni. Tun dinhmunah Bazar building hluiah hian sumdawng thu nghet mi 1073 in thutna/dawr an nei mek a; enge maw change rawn inzuar te nen mi 2000 chuang sumdawng thu thin anga ngaih a ni. Mithiamte sawidan chuan he building hi a sawprawp tawh em avang hian a chhunga mihring sang tell eh anmahni dawrtu sangtel leh an bungraw rihna ringawt pawh hian he building hi tlu sawp rup thei anga ngaih a ni a; Lirnghing liantham vak lo pawhin a sawi chhe hneh hle turah ngaih a ni.

New Market hmuna Meetingah hian a bialtu MLA leh Tourism Minister Pu Robert Romawia Royte pawhin thusawiin Cabinet meeting thu bawhzuia New Market Building hlui leh awngrawp tak endik hna tihzawh vat a ni chu lawmawm a tihthu sawiin Commerce & Industry Minister Dr R.Lalthangliana,MLA 3 lai leh Chief Secy hova Officials ten kokim taka a hmuna enho a ni chu lawmawm a ti a. Building hlauhawm tak hi thiah ringawt a tawklo a,tha zawka sakthat leh vat a tul thu leh tuna Bazara eizawng mekte dinhmun pawh Sorkarin a ngaihtuah a tul thu a sawi. Pu Romawia Royte chuan Mizoram pum rohlu tham he New Market hmunah hian Building lian zawk leh dawng hlawk zawk sak a rawt bawk a ni.

Tourism Minister Pu Robert Romawia, helai hmun bialtu MLA zinga pakhat ni bawk, MLA dang pathum Pu C.Lalmuanpuia, Pu C.Lalsawivunga leh Pu VL Zaithanzama, Chief Secretary Pu Lalnunmawia Chuaungo leh sawrkar mi pawimawh ten Commerce Minister hi an tawiawm a. Bazar chhunga  Sumdawng pawl hrang 50 chuang hruaitute nen inkawmna nei hmasa in Bazar building hi an tlawh kuala, bazara thu sumdawngte pawh an kawm kual nghal a ni.