Tunlai hian Mizoram hmun thenkhatah Saza (state Animal) thi/pul report a awm thin a. Hemi chungchangah hian Ramsa kan humhalh kawngah leh mipuite kan him zawk nan Environment & Forest Department chuan theihtawpin hma a la zel a. Vawiin khan DFO, Lunglei Forest Division chuan a hnuaia mi ang hian mipuite hnenah hriattirna a chhuah a ni :
1). Mizoram hmar lam hmun thenkhatah August/2015 thla tawp lam vel khan, Saza (State Animal) pul hri nia rin a leng tih PCCF Mizoram atangin hriattirna hmuh a ni a. PCCF thupek angin DFO zawng zawngte an bial chhung theuhah Saza thi a awm leh awm loh uluk taka thlithlai reng tura thupek an niin, chutiang thil a awm chuan report pe vat tura tih a ni.
2). Chumi bawhzui chuan Lunglei Forest Division hnuaia RO zawng zawngte chu an bial chhung theuhah Saza thi a awm leh awm loh uluk taka thlithlai reng tura thupek an ni a. Tin, Saza thi an hmuh chuan kut kawr (glove) bunin, a sa them (sample) la a report fel fai tak nen rang taka DFO Lunglei hnena submit tura hriattir an ni. Vide letter No. B.14016/7/2014-DFO(L)/87 dt 3.9.2015.
3). Tin, Lunglei Forest Division huamchhunga VC zawng zawngte pawh an ram chhungah Saza thi a awm leh awm loh ngaihven tura ngen leh hriattir an ni bawk. Vide letter No.B.14016/7/2014-DFO(L)/102 dt 28.9.2015.
4). VC te hnenah chuan hetiang hian ngenna siam a ni. Saza thi an hmuh chuan :-
(i). Rangtaka Forest mi leh sa hnai ber hnenah report vat tura ngen an ni.
(ii). Saza thi chu tuman kut lawnga khawih loh tur.
(iii). Saza thi sa chu tuman lak loh tur, A sa te phei chu ei reng reng loh tur, mihring tan a hlauhawm.
5). Tunah hian Saza pakhat thi Tawipui ramah hmuh niin a tul angin Forest Staff te’n hma an la mek a, a sa them (sample) lak niin Rapid Response Team, Southern Zone te hnenah a tul anga hma an lak zui atan pek a ni.
6). Saza thi chungchangah hian tumah chiai tur a ni lova. Amaherawhchu, Saza thi/dam lo hmu chuan engtinmah ti lovin Forest Official te hriattir vat nise, a lawmawm hle ang.
7). He Saza pul hri leng chungchangah hian a natna dik tak hi mithiamte’n an zir chiang mek.
8). He ramsa pul hri chungchangah hian mitin fimkhur ila, ramsa rep Saza sa kher lo pawh tuman lei in ei loh turin mipuite i fimkhur ang u.
