2316/2026-2027

Kolasib, 23rd September, 2026: Vawiin khan Kawnpui Joint Village Council buatsaihin Govt. Kawnpui Higher Secondary School leh Govt. Green Hill High School, Kawnpui (Provincialised) leh Lalfak Memorial High School (Lumpsum Special Category S2) hlankaina lawmna hun chu Kawnpui Chhimveng YMA Hall-ah hman a ni a. He hun hi School Education & Higher and Technical Education Minister, Dr. Vanlalthlana chuan khuallian niin a hmanpui a,  South Tuipui bialtu MLA Pu Jeje Lalpekhlua leh  Tuirial bialtu MLA Pu K. Laldawngliana te chu khualzahawm an ni. He inkhawm hi Kawnpui Joint VC, Pu Lalbiaknunga'n a kaihruai a ni.

Khuallian Dr. Vanlalthlana chuan Kawnpui khawtlang tan hun chhinchhiahtlak takah a tel thei chu lawmawm a tih thu a sawi a. Zirna inte chawisan a ni chu khawtlangin theih tawp an chhuah vang a ni, tiin zirtirtute pawh khawtlang zai ngai thiam a, khawtlang tana theih tawp chhuah ve zel turin a chah. Ad hoc atanga provincialise a nih avanga duhtawk mai lova, result tha zawk nei tura tan la thar leh turin a fuih a. Zirlaite pawh harsatna an tawh changa beidawng mai lo tur leh Pathian hnena tlukluhna chang hria a, nu leh pa, thiante leh zirtirtute rawn thin a pawimawh em em a ni, tiin kawng dik zawh turin a fuih bawk.

Khualzahawm , South Tuipui bialtu MLA Pu Jeje Lalpekhlua pawhin sorkarin theih tawp chhuaha school te a hlankai chu a lawmpui rualin, Education Minister chak tak kan nei chu lawmawm a tih thu a sawi. Inkhel thin mi a nih angin, India-in football-a hma a sawn theih lohna chhan pakhat chu coach leh player-te inkar a zauh thin vang a nih thu sawiin, hemi ang chiah hian zirtirtu leh zirlaite pawh inkungkaihna tha tak nena hma sawn zel turin a fuih a. Zirlaite chu school-a an zir duhtawk mai lova, in lama thahnemngai taka zir belha, thiamna tak tak nei turin a chah a ni.

Khualzahawm dang, Tuirial bialtu MLA Pu K. Laldawngliana chuan a bial chhunga school pathumte hlankai an ni chu lawmawm a tih thu sawiin, lawmpuina cheng 25,000/- theuh leh football a hlan  a ni. Pu K. Laldawngliana chuan zirna hi ram hmasawnna kailawn pawimawh ber a nih angin tha taka lehkha zir a hmasawn turin zirlaite a chah a. Zirtirtute pawh a hma aia thahnemngai zawka zirtirna pe turin a fuih bawk.

He hunah hian Lok Sabha MP, Pu Richard Vanlalhmangaiha pawhin school pathumte hlankaina lawmpui nan hian cheng 2,50,000/- (Nuai hnih leh sing nga) theuh a pe tih tarlan a ni bawk. Dr. Doris Lalrinawmi, MCS, SDO (Civil), Kawnpui leh Pi K. Lalsiamliani, DEO, Kolasib District te hnen atangin thusawi ngaihthlak a ni bawk.