Vawiin chhun dar 12:30 khan Pu Rohluna, School Education Minister hovin Mizoram Primary Teacher Association (MPTA) leh Middle School Teacher Association (MSTA) te chu School Education Minister office chamber-ah kumin SSA hnuaia atanga School enkawlna tur School Grant & Maintenance Grant pek chhuah tur thlir hovin an thu khawm.

Pu Rohluna chuan an thut khawm chhan sawiin tha hnemngaihna avang a nih sawiin SSA hnuaia school grant leh maintenance grant release mai tur chu tangkai tak leh a hmanna tur dik taka hman zui a nih ngei theih nan association hotute chu a tul anga hmalakpui tur leh lo en zui pui turin a sawm a; heng school grant leh maintenance grant te hi a pawisa hi tam tham lo mah se tangkai taka hman theih a nih thu sawiin tangkai taka hman a duh thu a sawi bawk. Pu Rohluna chuan tun hmaa kan palzam mai mai ang chi kha tunah chuan a theih tawh loh thu sawiin kan theih chin chinah fel fai zawk leh tha zawka kan kal theih nan hma lak chhoh mek a nih thu leh school grant leh maintenance grant te hi a  hmanna turah hman a ni em tih en zui a nih tur thu a sawi bawk.

Pu Joseph Lalhimpuia Parliamentary Secretary School Education Department pawhin thu sawiin, “Tunlaiah media a chak tawh si a, thil thleng  hrang hrang te pawh awlsam tein kan hre zung zung a, chu vang chuan neitu tak tak rilru pu chunga hna kan thawh a tul tawh tak zet a ni,” a ti. Tin, school managing board te’n khawtlang hruaitute nena thawh hona tha nei a, neitu rilru puttir thiam an pawimawh thu a sawi bawk. School-in hamthatna,  Department dang atanga a dawn theih chi chu a theih ang a bawhzui mek a nih thu a sawi bawk.

SSA atang hian kum tin school grant hi Govt. leh Govt. Aided Primary school-ah  Rs. 5000 theuh leh Middle school-ah Rs. 7000 theuh pek thin an ni a. Maintenance Grant hi Govt. school bikah chuan Primary School ah Rs. 7500 leh Middle school-ah Rs. 7500 pek thin an ni bawk. Heng school, grant leh maintenance grant te hi school thawm thatna atana hman tur a tih a ni.

He hunah hian SSA hotute leh MPTA leh MSTA hruaitute an tel kim hle a ni.