212/2025-2026

Dated the 17th April, 2025 : Vawiin khan Govt Mizo High School Hall-ah Aizawl District Education Office buatsaih Refresher Meeting neih a ni a, School Education Minister Dr Vanlalthlana'n khuallian niin a hmanpui.

School Education Minister chuan he hunah hian thusawiin sorkar apiang hian zirna siamthat nan an theihna leh thiamna an hmang zel a. Tun sorkar pawh hian siamthat hna a thawk chho mek a, zirna hi a pawimawh avangin zirtirtu lakah hian politics a inrawlh hi kan hlau a, zirtirtu lakah kher hi chuan politics a inrawlh hi kan phal lova, chumi hmang chuan zirna siamthat kan tum a ni a ti. Tun hnaia Samagra Shiksha hnuaia zirtirtu lakah leh casual teacher lakah te pawh a thiam thiam lak an ni a ti bawk. 

Minister chuan kutbeng rimawi hi kut pahnihin a siam a ni a, hetiang chiah hian zirnaah rimawi siam turin, leh lam atang ringawtin a siam theih lova, a tawn tawna tanrual a ngai a, zirtirtute nena tanrualna atang chauhin sorkarin zirnaah rimawi a siam thei tih sawiin zirna ina thawkte chu tan la sauh sauh turin a sawm a ni.

Minister chuan Sorkarin langtlangin hna a thawk mek a, vskmizoram.com-ah zirtirtute attendance-te, Samagra Shiksha hnuaia hnathawh te pawh a duh apiang tan en theih a ni a ti. Pawl 3&6 ah random-in exam buatsaih a ni a, beisei aiin result a tha a, NITI Aayog-in best practices-ah kan dah dawn an ti hial a ni a ti.

Minister chuan Transfer & Posting draft rules chu hrual that mek a ni a, a duh apiang en theih turin chhawp chhuah a ni dawn tih sawiin public consultation siam a ni dawn a, ziaka rawtna thehlutte chu inrawnkhawmnaah hian koh an ni dawn a ni a ti. 

Minister chuan zirna hmangin kan ram kan siam that a, kan hahchawlhna kan siam a ngai a tih sawiin, keiniho hian kan syllabus leh kan zirlaite atangin kan hahchawlhna i sual chhuak ang u tiin kalkhawm te chu a sawm a ni. 

Rev Dr K. Thanzauva Education Consultant chuan Classroom inzirtirna siamthat chungchang a sawi a, Mizoram zirna hi khawvel huapa midangte el pha tura kan siam a ngai a ti a. Tun hmain thingtlangah zirna tha tak a lo awm tawh, building leh furniture an nei tha lo, mahse zirna a tha a, India hna lakna sangah an tling thei tlat a ti a. Vawiinah hian kan ram zirna hi India chauh ni lovin khawvel huapa midangte el phak tura kan siam a ngai a ni a ti. Ram leh hnam hmangaihna nen kan zirtir loh chuan Mizoram hian rual kan pawl phak dawn lova, chuvangin tan kan lak a ngai a ni a ti. Classroom inzirtirna a that theih nan zirtirtuten lesson plan an siam a tul thu a sawi bawk.

He meeting-ah hian Pu C. Lalthanzira SPD Samagra Shiksha leh Pi Caroline Rinthanpuii Fanai SDEO te pawhin thu an sawi a ni.

He Refresher meeting-ah hian Aizawl Municipal Corporation Area-a Govt, Deficit, Adhoc Aided leh Samagra school te atangin Headmaster leh Principal te an kalkhawm a. Primary School Headmaster 110, Middle school Headmaster 94, High School Headmaster 42, Higher Secondary School  Principal 19, an vaiin 265 an kalkhawm a ni.