3152/2024-2025

Aizawl the 22nd November, 2024 : Vawiin khan School Education Minister Dr Vanlalthlana hovin School Education Complex Conference hall-ah School Education Department Quarterly Review meeting neih a ni.

Minister Dr Vanlalthlana chuan he hunah hian thusawiin Mizoram hi Pathianin min chawikan a duh a, kan ram chhehvelah an indo mup mup laiin Mizoram hi Pathianin min hria a, min hmangaih a ni a ti a. Kan ram chhunga mi chanhaite chawikang turin keini lo hi Pathianin hmanrua a nei lo a ni a ti.

Minister chuan Education Department-a thawktute tan chuan office dawhkan hi kan pulpit a ni a, kan dawhkan hi Pathian tan i hlan ang u a ti a, officer kalkhawmte chu office-a an let leh hunah inhlan thar theuh turin a sawm a, Pathianin kan hnate hi rawngbawlna atana min pek a ni a ti. Minister chuan zirna siamthat thawh chhoh mekah sikul naupang nei tlem sikulte chu a remchang apiang kaihkawp tum a ni a ti a, School inspection tha taka kalpui a pawimawh thu leh tan lak a ngaih thu a sawi a, aikal lak chungchangah sorkar a kal tlang dawn a ni a ti bawk. School sak leh repair hnaah a nih dan anga kalpui a pawimawh a, School-a thawkten bialtu DEO te hriatpui loh chuan lo tihdanglam a remchang lo a ni a ti bawk.

He review meeting-ah hian Education Consultant Rev Prof. Dr. K. Thanzauva pawhin thu a sawi a, School-ah class room-a zirtirna tihthat a tul thu leh tuna kan dinhmun chu a tha tawk lo nia a hriat thu a sawi a. Zirtirna titha tur hian zirtirtuten lesson plan uluk takin siam se, chumi hmang chuan zirtirna kalpui se, class room zirtirna a that theih a beisei thu a sawi a. Sikul mamawh hi sorkarin a pe vek seng lova, khawtlang nen tanrual a ngai a ni a ti.

School Education review meeting-ah hian School Education Officer te, MBSE, SCERT, Samagra Shiksha officer-te leh Education Reform Committee member-te an tel a ni.